हात्तीको आक्रमणबाट कञ्चनपुरमा एक जनाको मृत्यु

धनगढी । हात्तीको आक्रमणबाट कञ्चनपुरको लालझाडीका १ जनाको मृत्यु भएको छ ।

जिल्ला प्रहरी कार्यालय कञ्चनपुरका अनुसार मृत्यु हुनेमा लालझाडी गाउँपालिका–६ ढक्का शिविरका ४५ वर्षीय खगिराज राना रहेका छन् । उनलाई शनिबार राती हात्तीले आक्रामण गरेको थियो । हात्तीको आक्रमणबाट गम्भिर घाइते रानाको उपचारका क्रममा मृत्यु भएको आरक्ष सङ्घर्ष समितिका अध्यक्ष हीरासिंह भण्डारीले बताए ।

हात्तीको आक्रमणबाट घाइते भएका रानालाई उपचारका लागि बेलौरी अस्पतालमा लैजादै गर्दा उनको मृत्यु भएको भण्डारीले बताए । गाउँमा आएका हात्तीलाई भगाउने क्रममा हात्तीले आक्रमण गरी उनलाई घाइते बनाएको थियो । १५ भन्दा बढी हात्ती गाउमा आउँदा शिविरका बासिन्दाका २०  झुपडीसमेत भत्काएको छ ।