ओलानी चौकीडाँडा सडक निर्माण, सम्झौता मिति सकिनै लाग्दा काम सुरु

धनगढी । कैलालीको गोदावरी नगरपालिका अन्तरगत पर्ने ओलानी चौकिडाँडा सम्मको ‘बान्द्रखोला’ सडक निार्माण कार्य काम सम्पन्न गरिसक्नु पर्ने समयमा मात्रै सुरु भएको छ ।

सम्झौता भएको १४ महिना पछि काम सुचारु हुँदा तोकेको समयमा सडक निर्माण कार्य पुरा हुन नसक्ने देखिएको गोदावरी नगरपालिका–११ का वडा अध्यक्ष शिव विकले बताए । ‘सरकारी निकायलाई पटक–पटक जानकारी गराउँदा पनि ठेकदार कम्पनिलाई समयमै काममा लगाएनन्,’ वडा अध्यक्ष विकले भने, यही माघमा सक्नुपर्ने काम मंसिरबाट मात्रै सुरु भएको छ ।’

ढिलो गरी काम सुरु भएका कारण निर्धारित समयमा काम सम्पन्न हुन नसकिने देखिएको उनले बताए । प्रदेश सरकार भौतिक मन्त्रालय अन्तरगत पर्वाधार विकास कार्यालय र एड्भेन्चर, गेगिङ, सन्लाईट जेभि विच सडक निर्माणका लागि २०७७ भदौं १८ गते भएको सम्झौता अनुसार २०७८ माघ १७ गते भित्र सडक निर्माण गरिसक्नु पर्ने छ । तर यही मंसिर महिना देखि मात्रै ठेकदार कम्पनिले काम सुरु गरेको वडा अध्यक्ष विकले बताए ।

उनले ठेकदारले काम समयमै सुरु नगर्नुमा ठेकदार संगै प्रदेश सरकार पनि दोषि भएको बताए । ‘सडकको ठेक्का सम्झौता भएर काम सुरु नभएपछि ठेकदारलाई ताकेता गर्न भन्दै मैले दुई पटक पूर्वाधार विकास कार्यालयलाई पत्र पठाएको थिएं,’ उनले भने,‘तर सरकारी कार्यालयले वेवास्ता गरे, ठेकदार कम्पनि सम्पर्कमै आएनन् ।’

पूर्वाधार विकास कार्यालय कैलालीका प्रमुख जगतप्रसाद जोशीले भने अहिले सडक निर्माण कार्य सुरु भएको बताए । ‘ठेकदार कम्पनिले काममा तदारुकता नदेखाएपछि कारवाही गर्ने चेतावनी दिइएका थियौं,’ जोशीले भने, ‘अहिले बल्ल काम अघि बढाएको छ, कहिले काम सकिन्छ थाहा छैन ।’

उनका अनुसार १७ महिनामा काम सम्पन्न गर्नुपर्ने गरी ५ करोड ८४ लाख बजेटमा बान्द्रेखोला सडक निर्माणको ठेक्का सम्झौता भएको थियो । ‘सम्झौता अनुसार अलिे सडक निर्माण अन्तिम चरणमा हुनुपर्नेहो,’ उनले भने,‘तर त्यो हुन सकेन, अव जतिसक्दो छिटो काम सक्नेगरी निर्माण कम्पनिलाई दवाव दिने छौं ।’ २३ सय मिटर बान्द्रेखोला सडक निर्माणका लागि ५ करोड मा ठेक्का भएको थियो ।

आफु भरखरै कार्यालयमा आएको बताउँदै कार्यालय प्रमुख जोशीले कार्यालय आउनासाथ ‘बान्द्रखोला’ सडक निर्माणलाई प्राथमिकता दिएको बताए । ‘म कार्यालयमा आउनासाथ रोकिएका कामलाई सुचारु गराउन सुरु गर्न पहल गरेको छु,’ जोशीले भने, ‘धेरै काम सुचारु भएका छन्, केही काम सुरु हुँदैछन् ।’