सरकारले कर्मचारी माग नगर्दा सुदुरपश्चिममा लोकसेवाले भर्ना खोलेन

धनगढी । सम्पुर्ण तयारी पुरा भए पनि माग  सुदुरपश्चिम सरकारले माग नगर्दा सुदुरपश्चिम  प्रदेश लोकसेवा आयोगले  कर्मचारी भर्ना आव्हन गर्न सकेको छैन ।

“हामी सबै तयारी गरेर बसेका छौं ।” लोकसेवा आयोगका सचिव दुर्गादत्त बिष्टले भने  “माग आउने बित्तिकै कर्मचारीको आवश्यकता  प्रकाशित गर्ने तयारीमा छौं ।” 

सचिव बिष्टका अनुसार अहिलेसम्म प्रदेश सरकारले कर्मचारी भर्नाको माग नगरेका कारण तयारी पुगेर पनि कर्मचारी भर्नाको प्रकृया शुरु हुन सकेको छैन । लोकसेवा आयोगले सरकारले माग गरेका पदहरुमा कर्मचारी भर्नाको काम गर्दछ । तर सुदुरपश्चिम सरकारले लोकसेवा आयोगसँग कर्मचारी भर्नाको माग नै गरेका छैन । 

लोकसेवा आयोगले रिक्त कर्मचारीको बिबरण गत साउनदेखि नै पटक पटक माग गरे पनि अझैसम्म  यकिन बिवण सहित  प्रदेश सरकारले कर्मचारी भर्नाको माग गरेको छैन ।

सरकार गठन  भएको चार बर्ष पुगिसक्दा पनि  योजनाको कमजोर कार्यान्वयन कर्मचारी अभावकै कारण भएको प्रदेशका सबै मन्त्रालयलहरुले बताएँदै आएका छन् ।  

सचिव बिष्टले प्रदेश लोकसेवा आयोगको नियमावली,  निर्देशिका, पदाधिकारी, कर्मचारी र बिषय बिज्ञको आचारसंहिता, परिक्षा दस्तुर एवम खर्च मापदण्ड र २३ बिषयका  पाठ्यक्रम समेत तयार पारिसकेको बताए ।  भर्ना खुल्ने बित्तिकै अनलाइन मार्फत नै फर्म भर्नका लागि सबै प्राविधिक तयारी समेत भैसकेको  छ ।

आयोगले त्यसका लागि आफ्नो एप समेत तयार पारिसकेको छ । आयोगले प्राविधिक सहायक चौथो र पाँचौ तहका २३ पाठ्यक्रम समेत तयार पारिसकेको छ । सचिव बिष्टका अनुसार पाठ्यक्रम सुदुरपश्चिमको भुगोल सुहाउँदो निर्माण गरिएको छ ।

सबै प्रदेश र  केन्द्रको पाठ्यक्रमका बिशेषता समेटेर उत्कृष्ठ पाठ्यक्रम बनाईको सचिव बिष्टले बताए । पाठ्यक्रम आयोगको वेबसाइटमा नै हेर्न सकिन्छ । सरकारबाट माग आउने बित्तिकै ती तहको भर्ना खोल्ने आयोगको तयारी छ ।  प्रदेश सरकारका अहिले रिक्त रहेको दरबन्दीमा करिब आधार जति तिनै प्राविधिक  तहका रहेको बताइन्छ ।

“अनलाइन सिस्टम बाट नै परिक्षा फर्म भर्न  सक्ने बनाएका छौं ।” सचिव बिष्टले भने “अब एक क्लिक गरेर परिक्षा फर्म भर्न मिल्छ ।” सरकारले रिक्त रहेका कर्मचारीको यकिन संख्या बताइसकेको छैन । तर सुदुरपश्चिम  सरकारका करिब एक हजार पद रिक्त रहेको अनुमान छ ।

आयोगले गत भदौमा नै कर्मचारी भर्नाको आव्हान गर्ने तयारी गरेको थियो । तर कर्मचारी भर्नाको माग नआउँदा अहिलेसम्म भर्ना प्रकृया आयोगले अघि त्रढाएको छैन ।

सुदुरपश्चिम लोकसेवा आयोग ऐनमा प्रदेश सरकारले माग गरेको पदमा लोकसेवा आयोगले कर्मचारी भर्ना प्रकृया  शुरु गर्नु पर्ने व्यवस्था गरिएको छ ।  आयोगले पाठ्यक्रम निर्माण, प्रश्नपत्र निर्माणको कामका लागि रोष्टर निर्माणका लागि  बिषय बिज्ञ र बिशेषज्ञहरुको सुची तयार गरिसकेको छ ।

 सरकारबाट कर्मचारी भर्नाका माग आएपछि कुन तहको बिज्ञापन कुन महिनामा गर्ने, कुन महिनामा परिक्षा सञ्चालन गर्र्ने, कुन महिना अन्तरवार्ता लिने र  कुन महिनामा सिफारिश भनेर बार्षिक कार्यतालिका  नै सावैजनिक गर्न तयारी रहेको सचिव बिष्टले बताए ।

सुदुरपश्चिम सरकारले  २०७७ चैतमा लोकसेवा आयोगको गठन गरेको थियो ।  गठन भएदेखि नै काम अघि बढाएको आयोगले आवश्यक सबै प्रकृया पुरा गरेर कर्मचारी भर्ना गर्ने तयारी गरेको हो ।

आयोगलाई  प्रदेश निजामति कर्मचारी, प्रदेश प्रहरी, प्रदेशका अन्य सरकारी सेवा, प्रदेश संगठित सेवा,  प्रदेशका स्थानीय तहका कर्मचारी र प्रदेशका स्थानीय तहका संगठित संस्थाका कर्मचारी भर्ना गर्ने जिम्मेवारी  दिइएको  छ ।

प्रदेशमा रहेका २२ स्थानीय तहले समेत आफ्नो पालिकामा रहेका रिक्त दरबन्दी बिबरण पठाएका छैनन् । नपठाएका पालिकाहरुलाई  रिक्त दरबन्दी बिबरण पठाउन  पत्र पठाइसकिएको आयोगका सचिव बिष्टले बताए । 

स्थापनकालादेखि नै सुदुरपश्चिम प्रदेशमा कर्मचारीहरुको अभाव रहेको छ । दरबन्दीका पदहरु रिक्त रहदा प्रदेश सरकारको काम पनि प्रभावित हुदै आएको छ । अहिलेसम्म संघीय लोकसेवा आयोगले पदपुर्ति गरेका र संघीय सरकारले प्रदेशमा खटाएका कर्मचारी र प्रदेश सरकारले करारममा नियुक्त गरेका कर्मचारीका  आधारमा सुदुरपश्भिम प्रदेश सञ्चालन भैरहेको छ ।