बन्चरो प्रहार गरी बुवाको हत्या गरेको आरोपमा युवक पक्राउ

धनगढी । कञ्चनपुरमा बन्चरो प्रहार गरी बुवाको हत्या गरेको आरोपमा छोरा पक्राउ परेका छन् । पक्राउ पर्नेमा कञ्चनपुरको लालझाडी गाउँपालिका–२ का २२ बर्षिय राम विलास राना रहेका छन् । उनले आइतबार राति आफ्नै ४० वर्षीय बुवा ठग्गु रानालाई बन्चरो प्रहार गरेको इलाका प्रहरी कार्यालय बेलौरीले जनाएको छ ।

राति करिब १० बजेतिर सुतीरहेको अवस्थामा राम विलासले बुवालाई बन्चरो प्रहार गरेको बैलौरीका प्रहरी निरीक्षक कमल कुमार खडकाले बताए । हत्याको सूचनापछि तुरुन्तै आरोपित छोरालाई पक्राउ गरेर प्रहरी हिरासतमा राखिएको उनले बताए ।

प्रहरी निरीक्षक खडकाका अनुसार घरायसी विवादका कारण राम विलासले ठग्गुको हत्या गरेको प्रारम्भिक अनुमान गरिएको छ । मृतकको शव परीक्षणका लागि धनगढीको सेती प्रादेशिक अस्पतालमा पठाइएको र आरोपितमाथि थप अनुसन्धान भइरहेको प्रहरीले जनाएको छ ।