कैलाली, कञ्चनपुरका सिडिओलाई गृहमन्त्रीको फोन

धनगढी । गृहमन्त्री बालकृष्ण खाँणले कैलाली, कञ्चनपुर लगायत विभिन्न जिल्लाका प्रमुख जिल्ला अधिकारीलाई फोन गर्दै जिल्लाको शान्तिसुरक्षाको अवस्था लगायतका विषयमा जानकारी लिएका छन् । गृहमन्त्री खाँणले बुधबार बिहान १४ जिल्लाका प्रजिअसँग टेलिफोनमार्फत जानकारी लिएका हुन् । गृहमन्त्री खाँणले १३ प्रमुख जिल्ला अधिकारी र एक सहायक प्रमुख जिल्ला अधिकारीसँग टेलिफोन वार्ता गरी जानकारी लिएका हुन् ।

फोनवार्तामा गृहमन्त्री खाँणले जिल्लामा कोभिड–१९ सङ्क्रमण, जिल्लाको शान्ति सुरक्षा, जिल्लाबाट जनताले पाएका सेवा सुविधा, कर्मचारीको विवरणबारे जानकारी लिनुका साथै कर्मचारी पठाउनु पर्ने या नपर्ने तथा जिल्ला सुरक्षा समितिको बैठक नियमित बसेको छ कि छैन भनेर सोधपुच गरेका हुन् । उनले प्रमुख जिल्ला अधिकारी किरण थापा (कैलाली), रामप्रसाद पाण्डे (कञ्चनपुर) इन्द्रदेव यादव (सुनसरी), काशीराज दाहाल (मोरङ), छविलाल रिजाल (झापा), कृष्णबहादुर कट्वाल (बारा), ध्रमेन्द्र मिश्र (नवलपरासी पश्चिम), ऋषिराम तिवारी (रुपन्देही) सँग टेलिफोन वार्ता गरेका छन् । कञ्चनपुरका प्रजिअ पाण्डेले गृहमन्त्रीको टेलिफोनले आफूलाई मातहतका निकायसँगको सम्बन्ध र तथ्याङ्कबारे जतिबेला पनि जानकारी राख्न सजक गराएको बताए ।

त्यसैगरी चक्रपाणी पाण्डे (कपिलवस्तु), सूर्यबहादुर खत्री (बाँके), सन्तबहादुर सुनार (बर्दिया), हिरालाल रेग्मी (दाङ), उमेशकुमार ढकाल (पर्सा) र  नवलपरासी पूर्वका सहायक प्रमुख जिल्ला अधिकारी चित्रांगत बरालसँग पनि गहृमन्त्रील कुराकानी गरेका थिए ।