पृथ्वीपुर छोटी भन्सार दुई वर्षदेखि बन्द

धनगढी । कैलालीको भजनी नगरपालिका–५ रहेको पृथ्वीपुर छोटी भन्सार विगत दुई वर्षदेखि बन्द रहेको छ । पहिलो चरणको कोरोनाको सक्रमण सुरु भएपछि बढेपछि सो भन्सार बन्द भएको थियो । पहिलो कोरोना संक्रमणमा बन्द भएका कैलालीका अन्य सीमा नाका भने सुचारु भइसकेका छन् ।

छोटी भन्सार बन्द हुँदा भन्सार कार्यालयको परिसर पनि निकै नाजुक अवस्थामा पुगिसकेको छ । कार्यालय परिसरमा झारपात उम्रनुका साथै भवन संरक्षणको अभाव देखिएको छ ।  सरकारले भारतसँग सिमा जोडिएका सबै सिमानाका खुला गर्ने निर्णय गरे पनि बन्द भएको उक्त भन्सार सञ्चालनमा नआउँदा त्यहाँबाट सङ्कलन हुँदै आएको राजस्व पनि बन्द भएको छ ।

खक्रौलास्थित सत्ती भन्सार कार्यालयको मातहतमा रहेको उक्त छोटी भन्सार बन्द हुँदा त्यस क्षेत्रबाट चोरी तस्करीका घटनासमेत बढ्दै गएका छन् । भन्सार कार्यालय खुला हुँदा कम्तीमा पनि स्थानीयवासीले ल्याउने घरायसी सामानको भन्सार महशुल तिरेर  ल्याउने गरेका थिए । भजनी नगरपालिका–५ का सुरेन्द्र चौधरीले भन्सार तथा आसपासका क्षेत्रमा रातिको समयमा निकै हलचल हुने गरेको बताए । ‘यस क्षेत्रबाट चोरी तस्करीको सामान निकै आयात हुनेगरेको छ। त्यो सत्ती भन्सार कार्यालय, प्रहरी प्रशासन र स्थानीय जनप्रतिनिधिलाई पनि राम्रोसँग थाहा छ’, उनले भने, ‘सबै तस्करसँग मिलेका छन्, कसैले केही बोल्ने कुरै भएन, कहिलेकाहीँ बार्गेनिङ नमिलेपछि मात्रै एक्सन लिने काम हुन्छ ।’

सत्ती भन्सार कार्यालयका प्रमुख विमलकुमार साह कोरोनाका कारण  पहिलो चरणको बन्दाबन्दीका समयमा बन्द भएका देशभरका कुनै पनि छोटी भन्सार सञ्चालनमा आउन नसकेको बताए । भन्सार विभागबाट छोटी भन्सार सञ्चालनमा ल्याउनका लागि अख्तियारी नआएका कारणले पनि छोटी भन्सार सञ्चालनमा ल्याउन नसकिएको उनको भनाइ छ । ‘हामीले चाहेर पनि भन्सार खुला गर्न सक्दैनौ, विभागको अख्तियारी चाहिन्छ, त्यो अख्तियारी अहिलेसम्म आएको छैन,’ उनले भने, ‘कुनै पनि छोटी भन्सार सञ्चालनमा आएका छैनन्। अख्तियारी आएपछि हामीलाई भन्सार सञ्चालनमा ल्याउन कुनै कठिनाइ छैन ।’ यस अघि छोटी भन्सारबाट बार्षि ४० लाख सम्म राजस्व संकलन हुने गरेको उनले बताए ।