तीन दिन सम्म खुलेन बझाङ जोड्ने यातायात

धनगढी । हिमपात भएको तीन दिन सम्म पनि बझाङको यातायात सुचारु हुन सकेको छैन । बैतडीको बाजपानी–श्रीभावर क्षेत्रमा परेको बाक्लो हिँउ पञ्चाउन ढीलाई हुँदा सयौं यात्रु अलपत्र परेका छन् । तराईबाट बझाङका लागि छुटेका र बझाङबाट तराईका लागि ‘छुटेका सार्वजनिक सवारी बाटोमा अलपत्र परेका छन्,’ यात्रु शुलोचना जोशीले भनिन्, ‘खाने व्ययस्था नहुँदा धेरै समस्या भइरहेको छ, उपचारका लागि आएका विरामी झनै समस्यामा परेका छन् ।’

उनले आइतबार सम्म पनि यातायात सुचारु गराउन कसैले चासो नदिएको बताइन् । राजमार्ग अवरुद्ध हुँदा काठमाडौँ, धनगढी, महेन्द्रनगर, डडेल्धुरा, बैतडीबाट छुटेका र बझाङबाट बाहिरी जिल्लाका लागि छुटेका यात्रुवाहक तथा मालवाहक सवारीसाधन बीच बाटोमै रोकिएका छन् ।

अवरुद्ध राजमार्ग खुलाउन प्रयास भइरहेको बैतडीका प्रहरी प्रवक्ता प्रहरी निरीक्षक दर्शन खड्काले बताए । सो सडक खण्डको हिँउ पञ्छाउन दुई जेबिी प्रयोग गरिएको उनले बताए । तर बाक्लो हिँउ जमेका कारण सडक सुचारु गर्न समय लागेको उनले बताए । उनले आज दिउँसो पछि सडक सुचारु हुन सक्ने बताए ।