बझाङमा अनियमित विद्युत कटौतिका कारण व्यवसायीलाई सास्ति

धनगढी । बझाङमा अनियमित रुपमा विद्युत कटौति हुादा व्यवसायी तथा उद्योगिलाई सास्ति भएको छ ।

राष्ट्रिय प्रसारण लाइन पुगेको चार वर्ष भइसक्दा पनि विद्युत् सेवा अनियमित हुन नरोकिएपछि दैनिक जनजीवन र व्यापार व्यवसाय प्रभावित भएको छ । चार वर्षअघि राष्ट्रिय प्रसारण लाइनमा जोडिएको यस जिल्लामा सेवा सुरु भएदेखि नै पटकपटक विद्युत् सेवा अवरुद्ध हुने गरेका कारण उपभोक्ताहरू मारमा परेका हुन् ।

मौसममा सामान्य बदली हुँदा विद्युत् अवरुद्ध हुने समस्या ४ वर्षसम्म पनि हट्न सकेको छैन । ‘बादल लाग्दा, हावा चल्दा र पानी पर्दासमेत विद्युत् अवरुद्ध हुने गर्दछ,’ स्थानीय प्रेम शाहले भने, ‘अब राष्ट्रिय लाइन आयोजना बिजुलीका दुःख हट्ने भयो भनेर खुसी भयौँ, झन् पहिलाको भन्दा बढी अवरुद्ध हुन थाल्यो । देश लोडसेडिङ मुक्त भनेर घोषणा भएको छ । हामी भने हप्तौँसम्म अन्धकारमै बस्नुपरेको छ ।’

राष्ट्रिय प्रसारण लाइन पुग्नुभन्दा पहिला यहाँका बासिन्दालाई विद्युत् प्राधिरकरणले नै निर्माण गरेको २ सय किलोवाट क्षमताको सुर्मादेवी साना जलविद्युत् आयोजनाबाट उत्पादित विद्युत् वितरण गर्ने गरिएको थियो । राष्ट्रिय प्रसारण लाइनमा खराबी आएका बेला सदरमुकाम र आसपासका गाउँलाई सेवा दिँदै आएको यो विद्युत् पनि गत कात्तिकमा आएको बेमौसमी बाढीका कारण हाल बन्द रहेको छ ।

बाढीले इन्टेक र नहर बिग्रिएकाले यसको मर्मत हुन सकेको छैन । विद्युत् नभएका कारण बिक्री नभएको मासुलाई भण्डारण गर्ने व्यवस्था नहुँदा अधिकांश मासु पसलले दैनिक ठूलो घाटा व्यहोर्नुपरिरहेको छ । यस्तै दूधजन्य पदार्थ पनि भण्डारण गर्न समस्या भएका कारण खेर फाल्नुपरेको डेरी सञ्चालक सावित्री सिंहले बताइन् ।