निर्माण सम्पन्न भएको पुल सञ्चालन नहुँदा सास्ती

धनगढी । दार्चुलामा निर्माण सम्पन्न भइसकेका झुलङ्गे पुल प्रयोग गर्ने अनुमति नहुँदा स्थानीय खोलाको जोखिमपुर्ण यात्रा गर्न बाध्य भएका छन् । पुल प्रयोगमा नआउँदा स्थानीयले सास्ती खेप्नु परेको व्यास व्यासीले बताएका छन् ।

परम्परागत रूपमा प्रयोग हुँदै आएका तुइन पनि भारतीय सशस्त्र सीमा बल (एसएसबी) ले शनिबार हटाएपछि व्यास गाउँपालिकाका बासिन्दाले थप सास्ती खेप्नुपरेको छ । सरकारले व्यास–६, बडूगाउँस्थित महाकाली नदीमाथि गत वर्ष फागुनमै झोलुंगे पुल बनाइसकेको हो ।

उक्त पुल सञ्चालन हुन सके १ घण्टामै सदरमुकाम टेक्न सकिने स्थानीय महेश बडू बताउँछन् । व्यास–४ मल्घट्टेमा भने नेपाल–भारत जोड्ने झोलुंगे पुल माघ तेस्रो साता बनिसकेको हो । उक्त पुलको मुन्तिर तुइन थियो ।

‘एसएसबीले त्यो पनि हटायो,’ स्थानीय हरकसिंह विष्टले सुनाए, ‘अब त खलंगा पनि ८ घण्टामा मात्रै पुगिन्छ, झोलुंगे पुल खुलाइदिए हुन्थ्यो ।’ पहिलेदेखि नै बनिसकेका पुल खोल्न स्थानीय बासिन्दाले आग्रह गर्दा समेत प्रशासनले वेवास्ता गरेको स्थानीय बताउँछन् । व्यास गाउँपालिका र जिल्ला प्रशासन कार्यालयलाई समेत पटक–पटक अनुरोध गर्दा पनि सुनुवाइ नभएको उनीहरूको भनाइ छ ।