आज मतदान हुँदै, तनि नेता प्यानल सहित मैदानमा

धनगढी । नेपाली कांग्रेस कैलालीको १४ औं साधारसभा आज सुरु हुँदैछ । साधारणसभाबाट नयाँ नेतृत्व चयन हुने छ । नयाँ नेतृत्वका लागि देउवा पक्षका दुई जना समुह सहित प्रतिस्पर्धामा उत्रिएका छन् । कमजोर मानिएको शेखर कोइराला  पक्षले पनि सभापति सहित सहित सबै पदमा उम्मेदवारी दिएको छ ।

सभापति शेर बहादुर देउवाको पक्षका नारायण दत्त भट्ट र प्रकाश बहादुर बम पुरै टीम सहित प्रतिस्पर्धा गर्दैछन् । सभापति देउवाको आधिकारिक उम्मेदवारको रुपमा भट्ट प्रतिस्पर्धा गर्दैछन् । तर आधिकारिकताको बारेमा जानकारी नभएको बताउने अर्का उम्मेदवार बम टीम निर्माण गरेर प्रतिस्पर्धामा उत्रिएका छन् ।

त्यसैगरी शेखर कोइराला पक्ष बाट सभापतिमा रामबहादुर कलेलको नेतृत्वमा सबै पदमा प्रतिस्पर्धा गर्दैछ । संस्थापन पक्षका दुई उम्मेदवारको फाइदा आफुले पाउने दावी उक्त पक्षको छ ।  

आधिकारिकता पाएका भट्टको टीमबाट यसअघिको अधिवेशनमा  सभापतिमा पराजित भएका भीम बहादुर बडुवाल उपसभापतिमा प्रतिस्पर्धा गर्दैछन् । बडुवाल यसअघिको अधिवेशनमा सभापतिमा नरनारायण शाहसँग पराजित भएका हुन् ।  भट्टको टीमबाट उपसभापतिमा  बडुवाल र रामप्रशाद चौधरी, सचिवमा केशव मिश्र र अमृत बिसी, सहसचिवमा रामसमझ राना र कलेसु चौधरीले उम्मेदवारी दिएका छन् ।

नेपाली काँग्रेस कैलालीको कार्यवाहक सभापति रहेका बमको टीमबाट उपसभापतिममा कैलाली निर्वाचन क्षेत्र नम्बर ३ का निवर्तमान सभापति खेम चौधरी र तेज शंकर भट्ट प्रतिस्र्धा गर्न लागेका छन् । बमको टीमबाट  सचिवमा नृप सुनार र थर्क शाह, सहसचिवमा कृष्ण पाण्डेय र राजेन्द्र खड्काको उम्मेदवारी परेको छ ।

बमलाई नेपाली काँग्रेस कैलालीका सभापति एवम सुदुरपश्चिम प्रदेशका महामन्त्री नरनारायण शाहको समर्थन छ । शाहकै अग्रसरतमा सभापतिको दावेदार रहेका चौधरी बमको टीमबाट उपसभापतिमा प्रतिस्पर्धा गर्न सहमत भएका हुन् ।

संस्थापन इतरका कलेलको टीमबाट उपसभापतिमा यज्ञनिधि कोइराला र लोकराज पाण्डेय ‘आगो’ सचिवमा देवानन्द जैशी र नवराज जोशी, सहसचिवमा रविन्द्र प्रताप सिह र तीर्थराज जोशीको उम्मेदवारी परेको छ ।

जिल्लामा पालिका, प्रदेश निर्वाचन क्षेत्र, संघीय निर्वाचन क्षेत्र र प्रदेशको निर्वाचनमा शाहको टीममा नै  रहेका कैलालीबाट प्रतिनिधित्व गर्ने काँग्रेसका पाँच केन्द्रिय सदस्यहरु अहिले भट्टको पक्षमा खुलेका छन् । भट्टको पक्षमा  खुलेका केन्द्रिय सदस्यहरु रण बहादुर रावल, रामजनम चौधरी, नृप वड, सुशीला मिश्र भट्ट र जीवन राना हुन् ।  तर सभापतिका उम्मेदवार बम जनस्तरमा आफनो पक्ष बलियो रहेकाले केन्द्रिय सदस्यहरुले समर्थन गर्दैमा  खासै फरक नपर्ने बताउँछन् ।

सभापतिका उम्मेदवार भट्ट पार्टीमा आफ्नो योगदान, केन्द्रिय सदस्यहरुको  समर्थन र वरिष्ठताका कारण सहज रुपमा जित हुने बताउँछन् । संस्थापन इतर पक्षका काँग्रेस कैलालीका सचिव दिपक जोशी संस्थापन पक्षका दुई टीमको प्रतिस्पर्धाले आफुहरुलाई सहज हुने बताउँछन् । बिगतको भन्दा यसपटक जिल्लामा आफ्ना पक्षका मतदाताहरु बढेको बताउँदै जोशी मतदान हुदासम्म थप सहज हुने बताउँछन् ।

गत मंसिरमा निर्वाचन क्षेत्र नम्बर ४ को महाधिवेशन प्रतिनिधिको मत गणना विवादका कारण ढिलो भएपछि कैलाली जिल्ला अधिवेशन हुन सकेको थिएन । उक्त बेला हुन नसकेपछि जिल्लाको नयाँ नेतृत्वको चयन प्रकृया शनिबार शुरु भएको हो । निर्वाचन क्षेत्र नम्बर ३, ४ र ५ को महासमितिको निर्वाचन पनि यसँसँगै भैरहेको छ । 

कैलालीमा सभापतिमा १ जना, उपसभापति २ जना,  सचिव २ जना, सहसचिव २ जना, प्रत्येका गाउँपालिकाबाट १ महिला सहित गरि छ गाउपालिकाबाट १२ जना सदस्य,  उपमहानगरपालिकाबाट २ महिला सहित ५ सदस्य, खस आर्य बाट ४ महिला सहित ९ सदस्य, आदिवासी जनजातिबाट १ सदस्य, मधेशी मुस्लिमबाट १ सदस्य, दलितबाट ३ सदस्य, थारुबाट ५ महिला सहित १० सदस्य र अल्पसंख्यक अपाङ्गबाट १ सदस्यका लागि निर्वाचन हुदैछ ।