शुक्लाफाँटामा बाघ गणनाका लागि जडान गरिएको क्यामेरा चोरी

धनगढी । कञ्चनपुरको शुक्लाफाँटा राष्ट्रिय निकुञ्जमा बाघ गणनाका लागि जडान गरिएको क्यामेरा चोरी भएको छ । राष्ट्रिय बाघ गणनाका लागि जडान गरिएका तीन जोडी क्यामेरा चोरी भएका जनाइएको छ ।

शुक्लाफाँटासँगै लालझाडी संरक्षित क्षेत्र र जोगबुडा क्षेत्रमा क्यामेरा चोरी भएको निकुञ्जका सहायक संरक्षण अधिकृत नुरेन्द्र अर्यालले बताए । उनका अनुसार बाघ गणनाका लागि जडान गरिएका दुइजोडी क्यामेरा फुटाइएको अवस्थामा भेटिएका छन् ।

अर्यालका अनुसार शुक्लाफाँटा राष्ट्रिय निकुञ्जभित्र एक क्यामरा बाघले लगेर तोडफोड गरेर पुनः त्यही ठाउँमा राखेको पाइएको हो । एक क्यामरा हात्तीले तोडफोड गरेर फालेको अवस्थामा भेटिएको छ । बाघ र हात्तीले क्यामरा फुटाएको उनले बताए । यस्तै निकुञ्जको शुक्लाफाँटा घाँसे मैदान क्षेत्रमै राखिएको क्यामरा बाघले लगेको जनाइएको छ ।

लालझाडी संरक्षित क्षेत्रअन्तर्गत डाँडाजाई क्षेत्रमा राखिएका दुई जोडी क्यामरा चोरी भएको उनको भनाइ छ । यस्तै, लालझाडी संरक्षित क्षेत्रअन्तर्गत नै कृष्णपुरको दोमिल्ला क्षेत्रमा पनि एक जोडी क्यामरा तोडफोड भएको छ । डडेल्धुरा जोगबुडाको चिरिकिट्टेमा पनि एक जोडी क्यामरा तोडफोड गरिएको छ ।