बालबालिकालाई दिइने पोषण गुणस्तरहिन

गोपाल भट्ट
धनगढी । डडेल्धुरामा बालबालिकालाई दिइने पोषण समाग्री बालभीटा गुणस्तरहिन भएको पाइएको छ ।

जिल्लाको परशुराम नगरपालिकाका स्थित अधिकांश स्वास्थ्य संस्थामा उपलब्ध बाल भिटा डल्लो परेको -गुणस्तरहीन_ भेटिएको जनाइएको छ । बालभिटाको बट्टामा प्रयोग अवधि सन् २०२२ को अगष्टसम्म उल्लेख भए सो सामाग्री भने प्रयोग गर्न मिल्ने खालको नभएको स्वास्थ्यकर्मीनै बताउँछन् ।

बाल भिटाभित्र धुलो हुनुपर्ने भए पनि ढिक्का भएको परशुराम नगरपालिका–४ कटाल स्वास्थ्य चौकीका अहेव नन्दराम नाथले बताए । उनले यस्तो समस्या नगरपालिकाभरि नै रहेको बताए । ‘जिल्ला स्वास्थ्य कार्यालयबाटै यस्तो पठाएको हो, यता भण्डारणमा समस्या छैन, सप्लाइमा समस्या हो,’ अहेव नाथले भने, ‘हामी अहिले यो नै वितरण गरिरहेका छौं, बालभिटा प्रयोग गर्नेहरूलाई डल्लो आएमा प्रयोग नगर्न र धुलो मात्रै प्रयोग गर्न भनेका छौं ।’

जिल्ला स्वास्थ्य कार्यालयले परशुराम नगरपालिकामा दुई महिनाअघि बाल भिटा पठाएको उनले बताए । पहिले पठाएको बाल भिटामा समस्या देखिएपछि पछिल्लो पटक पठाएको सामाग्री भने राम्रो रहेको उनले बताए ।

बाल भिटामा समस्या देखिएपछि वितरण नगर्न स्वास्थ्य संस्थालाई निर्देशन दिएको परशुराम नगरपालिकाका स्वास्थ्य संयोजक तेजबहादुर सिंहले बताए । ‘कार्टुन हामी खोल्दैनौं, साथीहरूबाट डल्लो आएको गुनासो आएपछि प्रयोग नगर्न  र स्वयंसेविकालाई नदिन भनेका छौं,’ उनले भने, ‘उपभोक्तासम्म नपुगेको होला, तर कसैले जानकारी नपाएर दिएको हुन सक्छ, जिल्ला स्वास्थ्य कार्यालयमा बुझ्दा हामीलाई पनि त्यस्तै आएको भन्नु हन्छ ।’