दार्चुलातर्फ फर्काइयो महाँकालीको धार

धनगढी । भारतले महाँकालीको धार दार्चुला तर्फ सोझिने गरी नदीलाई साँघुरो बनाएको छ । स्थानीय वासीले गरेको सिवरोधको वेवास्ता गर्दै भारतले एस्काभेटर प्रयोग गरी नदीको धार परिवर्तन गरेको हो ।

अन्तर्राष्ट्रिय सीमा नदी मिचेर पक्की तटबन्ध बनाइरहेको भारतीय पक्षले करिब सय मिटर क्षेत्रमा नदीलाई साँघुरो बनाउादै पानीकै धार नेपाल तर्फ फर्काएको हो । भारतीय तटबन्ध र नदीको बदलिएको धारका कारण वर्षातमा बाढीले नेपालपट्टि क्षति गराउने जोखिम उच्च बनेको छ ।

स्थानीयका अनुसार भारतीय पक्षले केही दिनदेखि बांगाबगरमा एस्काभेटर प्रयोग गरेर आफ्नै क्षेत्रपट्टि ढुंगा पन्छाइरहेको छ । बिहीबार भने एक्स्काभेटरले नदीको बीचबाटै ढुंगा निकाल्न थालेपछि वारिका ४०÷५० जना किनारमा पुगेका थिए । स्थानीयले दार्चुला क्षेत्रबाट होहल्ला गरेपछि भएपछि एस्काभेटर पारि लगेर काम रोके जस्तो गरे ।

‘स्थानीयन नभएको मौका छोपेर भारतीय पक्षले नदीको बहाव नेपालतर्फ फर्काएछन्,’ बांगाबगरका विक्रम बडालले भने, ‘भारतीय पक्षले मंगलबार लास्कु खोलानजिक पनि महाकालीको बहाव परिवर्तन गर्ने गरी एस्काभेटर चलाउँदा बांगाबगर र पारि खोतिलाका बासिन्दाबीच ढुंगा हानाहान भएको थियो । लगत्तै दुवैतर्फ आएका सुरक्षाकर्मीले उनीहरूलाई थामथुम पारेपछि एक्स्काभेटर फर्काइएको थियो, स्थानीय घर फर्केपछि पुनः नदीमा एस्काभेटर प्रयोग भए छ ।’

बिहीबार नदीको धार फर्काएको क्षेत्र भने उक्त स्थानभन्दा करिब डेढ सय मिटर तल पर्छ । लास्कु खोलानजिक भारतीय पक्षले तटबन्धको जग खनिरहेको छ । बांगाबगरपारि भने भारतले पुरानो तटबन्ध नभत्काई नदी मिचेर नयाँ पक्की तटबन्ध बनाइरहेको छ । निर्माणाधीन तटबन्धले नदीको धार नेपालतिर फर्काउने र वर्षायाममा बढी क्षति पुग्ने चिन्ता वारिका बासिन्दाको छ । भारतीय तटबन्धका कारण २०७० सालको बाढीले बांगाबगर क्षेत्रका १ सय ५६ घर बगाएको थियो । त्यति बेला नदीले धार बदल्दा नेपालीको घर भएको जमिन नदी पारिपट्टि परेको छ ।