रेलमार्ग निर्माणका लागि जनप्रतिनीधि संग छलफल

धनगढी । नेपाल सरकारले कैलाली कञ्चनपुर सम्म सञ्चालन गर्ने भनिएको रेल मार्ग सम्बन्धमा कैलाली कञ्चनपुरका जनप्रतिनीधि संग छलफल गरिएको छ । रेल मार्ग निर्माणका लागि  नेपाल सरकार भौतिक पूर्वाधार तथा यातायात मन्त्रालय अन्तर्गत रेल विभागबाट खटिएको अध्ययन टोलीले कञ्चनपुर र कैलालीका पालिकाहरूसँग छलफल गरेको हो ।

सो टोली अहिले वातावरणिय अध्ययनका लागि कैलाली कञ्चनपुर आएको वातावरणविद रिकेश चित्रकारले बताए । ‘वातावरणिय अध्ययन प्रतिवेदन तयार गर्ने क्रममा कञ्चनपुर पुगियो,’ उनले भने, ‘सोही क्रममा यहाँका स्थानीय जनप्रतिनीधि संग पनि आवश्यक परामर्श लिन छलफल गरिएको हो ।

टोलीले मेची–महाकाली रेलमार्ग आयोजना अन्तर्गत कैलालीको सुख्खडदेखि कञ्चनपुरको गड्डाचौकीसम्म ९० किलोमिटर लामो रेलमार्ग निर्माणका लागि वातावरणीय प्रभाव मूल्याङ्कन अध्ययन प्रतिवेदनका सिलसिलामा दुवै जिल्लाका सम्बन्धित पालिकाहरूसँग छलफल गरेको छ ।

कैलालीका घोडाघोडी नगरपालिका, गौरीगङ्गा नगरपालिका, धनगढी उपमहानगरपालिका र गोदावरी नगरपालिका तथा कञ्चनपुरका कृष्णपुर नगरपालिका, लालझाडी गाउँपालिका, शुक्लाफाँटा, वेदकोट र भीमदत्त नगरपालिकाको भूभागमा रेलमार्गका लागि वातावरणीय प्रभाव मूल्याङ्कन अध्ययन गरिरहेकोले ती पालिकाहरुसँग छलफल गरिएको अध्ययन टोलीका सदस्य एवं वातावरण विद् चित्रकारले बताए ।