धरौटीमा छाडिएका ३ जना पुनः पक्राउ

धनगढी । कैलाली लम्कीचुहा नगरपालिका स्थित खुकुरी प्रहार गरी हत्या गरिएका भुपेन्द्र बडुवाल प्रकरणमा पक्राउ परी धरौटीमा छुटेका तीन जनालाई प्रहरीले पुनः पक्राउ गरेको छ ।

उक्त मुद्दाको पुनरावेदन हुँदा उनीहरुलाई उच्च अदालत दिपायलले पुनः पक्राउ गर्न आदेश दिएपछि प्रहरीले ३ जनालाई समातेको हो । पक्राउ पर्नेमा बर्दियाको ठाकुरबाबा नगरपालिका–३ का २६ वर्षीय सन्तोष भन्ने सविनजग्ग शाही, कैलालीको लम्की चुहा नगरपालिका–३ का २८ वर्षीय विकास खड््का र    बर्दगोरिया गाउँपालिका–२ का २५ वर्षीय लोकेन्द्र कुँवर रहेका छन् । उच्च अदालतले गत फागुन ५ गते पुर्पक्ष गर्ने आदेश दिएअनुसार सोमबार उनीहरुलाई पक्राउ गरी आज मंगलबार जिल्ला अदातलमा पेश गरिने जिल्ला प्रहरी कार्यालय कैलालीले जनाएको छ ।

कैलालीको लम्की चुहा नगरपालिकाका २३ वर्षीय भुपेन्द्र बडुवालको कात्तिक २३ गते हत्या भएको थियो । उनको हत्या आरोप लागेका ८ जना अझै पनि फरार रहेका छन् । हत्या आरोपमा प्रहरीले १२ जनालाई पक्राउ गरेको छ ।