कैलालीमा चुनावि तालमेलका लागि कांग्रेसले राखेको प्रस्तावमा माओबादी र समाजबादीको असहमति

धनगढी । स्थानीय तह निर्वाचन अन्तरगत कैलालीमा गठबन्धन दल विच भएको चुनावि चालमेलको प्रयास टुङ्गोमा पुग्न सकेको छैन । चुनावि तालमेलका लागि गठबन्धन दलहरु विच निरन्तर बैठक चलेपनि सहमति हुन नसकेको हो ।

शनिबार कैलालीमा तालमेलका लागि नेपाली कांग्रेसले आफ्नो प्रस्ताव राखेपनि माओबादी केन्द्र र एकिकृत समाजबादी पार्टीले भने सो प्रस्ताव अस्वीकार गरेको छ । नेकपा माओबादी केन्द्रका जिल्ला संयोजक हरी ज्ञावालीका अनुसार नेपाली कांग्रेसले आफुलाई ७ स्थानीय तहको नेतृत्व राखेर माओबादी केन्द्रलाई ४  र एकिकृत समाजबादी पार्टीलाई २ स्थानीय तहमा भाग दिने प्रस्ताव ल्याएको छ ।

तर माओबादी केन्द्रले भने सो प्रस्ताव अस्वीकार गरेको संयोजक ज्ञावालीले बताए । ‘हाम्रो जिल्लाको बैठक बसेर ५ स्थानीय तह नपाए आफ्नै तरिकाले चुनाव लड्ने निर्णय भएको छ छ,’ संयोजक ज्ञावालीले भने, ‘४ स्थान मात्रै दिने गरी कांग्रेसले राखेको प्रस्ताव मान्य छैन, अव सहमति हुने अवस्था पनि देखिदैन ।’

उनले आइतबार बिहान सम्म पनि छलफल हुने बताए । माओबादी केन्द्रले कैलालीका ५ पालिकामा प्रमुख र ६ पालिकामा उप प्रमुख पद माग गरेको छ ।

नेकपा एकिकृत समाजबादी पार्टीका कैलाली संयोजक दिर्घ सोडारीले पनि कैलालीमा तालमेलका लागि सहमति नभएको बताए । उनले कैलालीमा समाजबादी पार्टीले कम्तिमा पनि तीन स्थान मागेको बताए ।

नेपाली कांग्रेस कैलालीका सचिव नृप सुनारले पनि अहिले सम्म कुनै सहमति नभएको जनाएका छन् । गठबन्धन दलहरु विच बैठक जारी रहेको भन्दै उनले सहमतिको नजिक पुगेको बताए ।