सुदूरपश्चिममा ९ हजार २० जनाले दिए उम्मेदवारी

धनगढी । बैशाख ३० गते हुने स्थानीय तहो निर्वाचनका लागि सुदूरपश्चिममा सोमबार राती सम्म ९ हजार २० जनाले उम्मेदवारी दिएका छन् । निर्वाचन आयोगले सार्वजनिक गरेको तथ्यांक अनुसार प्रदेशमा ३ हजार ८४६ जनप्रतिनीधी निर्वाचनबाट छनौंट हुने छन् । त्यसका लागि सोमबार राती सम्म ९ हजार २० जनाको उम्मेदवारी परेको निर्वाचन आयोगले जनाएको छ । तर सोमबार ५ बजे भित्र निर्वाचन अधिकृतको कार्यालयमा प्रवेस गरिसकेका आकांक्षिको भने आज पनि मनोनयन दर्ता हुने भएका कारण यो संख्या अझै बढ्ने आयोगको वेभसाईडमा उल्लेख गरिएको छ ।

सुदूरपश्चिम प्रदेशमा ८८ स्थानीय तह प्रमुख, ८८ उपप्रमुख, ७ सय ३४ वडा अध्यक्ष र २ हजार ९ सय ३६ वडा सदस्य गरी कुल ३ हजार ८ सय ४६ जनप्रतिनिधि चयन हुने छन् । सुदूरपश्चिमका ९ वटा मुख्य निर्वाचन अधिकृतको कार्यालय र ७९ निर्वाचन अधिकृतको कार्यालय मार्फत प्रदेशमा नगरपालिका र उपमहानगरपालिकाको मेयरका लागि १ सय ८९, उपमेयरका लागि १ सय ४७, गाउँपालिकाको अध्यक्षका लागि २ सय २४ र उपाध्यक्षका लागि १ सय ७३ जनाको उम्मेदवारी परेको छ ।

यस्तै वडा अध्यक्षका लागि २ हजार १ सय ९८, महिला सदस्यका लागि १ हजार ५ सय १७, दलित महिला सदस्यका लागि १ हजार ३ सय ८७ र सदस्यका लागि ३ हजार १ सय ८५ जनाको उम्मेदवारी परेको जनाएको छ ।