हयाबिटेटद्धारा भुमिहीन सुकम्बासी २५ परिवारलाई  खाद्यान्न  र हाइजिनिक कीट सहयोग

धनगढी ।  कन्चनपुरको बेदकोट नगरपालिका वडा नम्बर ५ धरमपुरमा भुमिहीन सुकम्बासी परिवारका लागि सुदुरपश्चिम प्रदेश सरकारसँगको सहकार्यमा भैरहेको घर निर्माणमा श्रम सहयोग गर्ने २५ परिवारलाई हयाबिटेट नेपालले खाद्यान्न र हाइजिनिक कीट बितरण गरेको छ ।

भुमि व्यवस्था, कृषि तथा सहकारी मन्त्रालयको भुमि व्यवस्था महाशाखाका प्रमुख धर्मराज ओझा, मेटलाइफ  इन्स्योरेन्सका अनिल भट्टले बिहीवार घर निर्माणमा श्रम सहयो गर्ने परिवारहलाई  खाद्यान्न र हाइजिनिक कीट प्रदान गरेका हुन् ।

भुमि व्यवस्था, कृषि तथा सहकारी मन्त्रालयको  एकीकृत  मुख्यमन्त्री बस्ती बिकास कार्यक्रम र हयाबिटेटको सहकार्यमा बेदकोट नगरपालिका वडा नम्बर ५ धरमपुमा भुमिहीन सुकम्बासी परिवारका लागि २५ घर निर्माण भैरहेका छन् ।  घर निर्माणका क्रममा लाभान्वित समुदायले २० प्रतिशत  श्रम योगदान गर्नुपर्ने व्यवस्था छ ।

घर निर्माणबाट लाभान्वित समुदायको जीवन सहजताका लागि घर निर्माणका गरेको योगदान स्वरुप खाद्यान्न र हाइजिनिक कीट प्रदान गरिएको ह्याबिटेट नेपाल पश्चिम फील्ड कार्यालय धनगढीका कार्यक्रम व्यवस्थापक पुनिता चौधरीले बताइन् । ह्याबिटेटले मेटलाइफ फाउण्डेशनको सहयोगमा खाद्यान्न बितरण गरेको हो ।

‘सबै परिवार दैनिक ज्यालादारीमा काम गरेर गुजारा गर्छन् । भवन निर्माणमा श्रम सहयोग गर्दा बाहिर काम गर्न पाएनन् ।’ कार्यक्रम व्यवस्थापक  चौधरीले भनिन– ‘त्यसैले घर निर्माणमा गरेको श्रम सहयोग बापत खाद्यान्न सहयोग गरिएको हो ।

सो अवसरमा  भुमि व्यवस्था महाशाखाका प्रमुख धर्मराज ओझाले हाल घर निर्माण भैरहेको जग्गाको लालपुर्जा नरहेकोले लालपुर्जा उपलव्ध गराउन आफुले पहल गर्ने बताए ।

धरमपुरमा रहेका भुमिहीन सुकुम्बासी ८४ परिवार मध्य १८ घर यसअघि निर्माण भैसकेका छन् भने २५ घरको निर्माण कार्य सकिने अवस्थामा  छ ।