डेंगुबाट जोगिन घरवरिपरि सरसफाइ आवश्यक

धनगढी। सङ्क्रमित लामखुट्टेको टोकाइबाट लाग्ने डेङ्गु रोगबाट जोगिनका लागि घर वरिपरि सरसफाइ गर्न आवश्यक रहेको जिल्ला स्वास्थ्य कार्यालयले जनाएको छ ।

सो कार्यालयले शनिबार डेङ्गु रोकथाम तथा न्यूनीकरणका लागि पत्रकारसंग गरिएको अन्तरक्रियामा सबैलाई आफ्नो घर वरिपरि सरसफाइ गर्न आवश्यक रहेको जनाएको हो । यसैगरी, पानी जम्ने ठाउँमा लामखुट्टेको उत्पादन हुने गरेकाले त्यस्ता ठाउँको पानी सुकाउन वा बेला–बेला मट्टितेल/डिजेल छर्कन आग्रह गरिएको छ ।

बट्टा, ट्याङ्की, ड्रम, प्लाष्टिक, टायर जस्ता ठाउँमा नियमित एक हप्ता पानी जमेमा डेङ्गु रोग सार्ने लामखुट्टेको वृद्धि हुने गरेको जिल्ला स्वास्थ्य कार्यालयका प्रमुख लालबहादुर धामीले बताए । ‘यस्ता ठाउँको पानी फाल्नुका साथै सरसफाइ गर्न आवश्यक छ’, उनले भने । ‘हाम्रो घरमा रहेको पानी ट्याङ्की खाली छोड्नु हुँदैन । राम्रोसंग बिर्को लगाउनु पर्दछ ।’ 

एडिस एजिप्टाइ प्रजातिको संक्रमित लामखुट्टेले टोकेमा मान्छेमा डेङ्गु सर्ने गर्दछ । डेङ्गु संक्रमित लामखुट्टेले अण्डा पनि संक्रमित नै पार्ने गरेको जनाइएको छ । यो लामखुट्टेले मान्छेलाई विहानी पख, दिउँसो र झिसमिसे साँझमा मान्छेलाई टोक्ने गर्दछ । राति टोक्दैन । 

डेङ्गु कैलालीमा महामारीको रुपमै देखिएकाले यसबाट बच्नका लागि सबै बेलैमा ध्यान पु¥याउन आवश्यक रहेको जनाइएको छ । डेङ्गु रोग लागेमा उपचार पनि खर्चिलो हुने, विरामीलाई आइसीयुमा राख्नु पर्ने जनाइएको छ । केही महिना अगाडि कैलालीको लम्कीमा डेङ्गुको केस धेरै बढेको थियो । अहिले धनगढीमा पनि डेङ्गुका बिरामी बढिररहेको जिल्ला स्वास्थ्य कार्यालयले जानकारी दिएको छ । 

डेङ्गुको एउटै मात्रै बिरामी देखा परेमा त्यसको महामारी हुने गरेको सो कार्यालयको ठहर छ । डेङ्गुले मान्छेको शरीरमा प्लेटलेट्सको मात्रा घटाउने गर्दछ । यो रोग लागेमा १०२ देखि १०३ डिग्री फरेनहाइटसम्म ज्वरो आउने, टाउको–पेट दुख्ने, वाकवाकी लाग्ने, जीउजोर्नी दुख्ने, रातो रातो बिमिराहरु देखा पर्ने जस्ता लक्षण देखिने गरेको प्रमुख धामीले बताए । अहिलेसम्म यसको लक्षण अनुसार लाक्षणिक उपचार हुँदै आएको र डेङ्गुका लागि सिटामोल नै उपयुक्त औषधि रहेको उल्लेख गरे ।

डेङ्गु रोग लागेमा बेलैमा उपचार गरेमा यसबाट हुने मृत्युलाई २ प्रतिशतमा झार्न सकिने धामीको भनाइ छ । कैलालीमा गतवर्ष १५६ जनामा डेङ्गु रोग लागेको थियो । यसवर्ष साउन महिनासम्म ७१ जनामा डेङ्गु रोग लागेको पुष्टि भएको जिल्ला स्वास्थ्य कार्यालयले जानकारी दिएको छ ।