सेतीका मेसु पाण्डेयले जनाए समर्थन

धनगढी । डाक्टर गोविन्द केसीको २० सौँ अनसन दोस्रो दिन पनि जारी रहेको छ । धनगढीको एलएन चौकमा रहेको लक्ष्मीनारायण मन्दिरको धर्मशालामा अनशनरत चिकित्सा शिक्षा सुधारका अभियान्ता डाक्टर गोविन्द केसीको स्वास्थ्य अवस्थामा कमीकमजोरी देखिन थालेका छन् ।

 केसीका सहयोगी अमृत जैसीका अनुसार डाक्टर केसीको २० औं सत्याग्रहको मंगलबार दोस्रो दिन अहिलेसम्म सबै चेकजाँचहरु गर्दा स्वास्थ्य अवस्थामा केही कमजोरी आएको छ ।

‘डाक्टर सापको शरिर अहिले केही कमजोर हुँदै गएको छ । रोगसंग लड्न सक्ने प्रतिरोधात्मक क्षमता कमी भएको छ । बोल्न सक्ने क्षमता पनि केही कमी आएको छ’ उनले भने ‘मंगलबार विहान स्वास्थ्य परिक्षण गर्दा सामान्य थियो । साँझ शरिर कमजोर बनेकाले बुधबार मात्र स्वास्थ्य परिक्षण गरेपछि उनको शरिरको अवस्थाबारे जानकारी हुनेछ ।’

डाक्टर केसी अनसन बसेको एक दिन पुरा भईसक्दा समेत उनको मागप्रति सरकारले कुनै प्रतिक्रिया दिएको छैन । ‘डाक्टर सापसंग सिधै सरकारबाट कुनै प्रतिक्रिया आएको छैन’ उनले भने –‘अनौपचारिक रुपमा मागबारे के गर्न सकिन्छ भन्नेबारे पहल भईरहेकोबारे विभिन्न व्यक्तिहरुबाट प्रतिक्रिया आईरहेको छ ।’ उनले सरकारले एक दुई दिनमै वार्ता टोली गठन गरि उनको मागबारे छलफल अघि बढाउने तयारी भईरहेकोबारे जानकारी आएको बताए । ‘भोलिसम्म वार्ता टोली गठन गरि छलफलका लागि पठाउने भन्ने जानकारी आएको छ’ उनले भने ।

मंगलबार बिहान पुर्व प्रधानमन्त्री डाक्टर बाबुराम भट्टराईले सार्वजनिक स्वास्थ्य शिक्षा क्षेत्र सुधारको माग राख्दै २० औँ पटक सत्याग्रह बस्नु सबैको लागि लज्जाको विषय भएको बताए ।

डाक्टर केसीले सोमबारदेखि २० औं अनसन सुरु गरेको विषयबारे मंगलबार सामाजिक सञ्जाल ट्वीटरमा भट्टराईले लेखेका छन् –‘सार्वजनिक स्वास्थ्य र शिक्षा क्षेत्रको सुधारको विषयलाई लिएर डाक्टर केसीले २० औं पटक अनसनमा बस्नु पर्ने आवस्था आउनु राज्य र हामी सबैलाई लज्जाको विषय हो ।’ 

डाक्टर केसीको दोस्रो दिनको अनसनमा सेती प्रादेशिक अस्पतालमा कार्यरत अस्पतालका मेडिकल सुपरिटेण्डेण्ट डाक्टर हेमराज पाण्डे लगायत विशेषज्ञ चिकित्सकहरुले भेटघाट गर्दै उनको अनसनमा समर्थन जनाएका छन् । डाक्टर पाण्डेले उनलाई आवश्यक पर्ने सम्पूर्ण उपचारका लागि चिकित्सकहरु तयारी अवस्थामा रहेको बताएका थिए ।

डाक्टर केसीले स्वास्थ्य सेवामा सुधारका लागि तोकिएको दरबन्दी अनुसारको क्षमता भन्दा बढी बेडमा चलिरहेका देशका सबै सरकारी अस्पतालहरुको दरबन्दी तत्काल हालको बेड संख्या अनुसार बढाउनुपर्ने माग राखेका छन् । 

त्यस्तै, जनसंख्याको वृद्धि अनुसार सरकारी स्वास्थ्य केन्द्र र अस्पतालहरुको निर्माण, स्तरोन्नति र गुणस्तर वृद्धि सुनिश्चित गरिनुपर्ने माग राखेका छन् । ‘स्वास्थ्य विज्ञान प्रतिष्ठान सम्बन्धी छाता ऐन जारी गरियोस् । आवश्यक कानुनी व्यवस्था गरी गेटा मेडिकल कलेजलाई तत्काल सञ्चालन गर्ने व्यवस्था गरियोस् । विभिन्न प्रतिष्ठानहरुमा जनशक्तिको अभाव पुर्ति गर्दै दाङ लगायत मधेश र गण्डकी प्रदेशमा तुरुन्त सरकारी मेडिकल शिक्षण संस्था निर्माण शुरु गरियोस् । चिकित्सा शिक्षा ऐन अनुसार २०८० सालसम्म सबै प्रदेशमा त्यस्ता संस्था सञ्चालनमा आउन् । यस अगाडि हामीसित सम्झौता भए बमभोजिम इलाम, उदयपुर र डडेल्धुरामा पनि सरकारी मेडिकल कलेज निर्माणको काम अघि बढाइयोस’, उनले भनेका छन् ।

प्रधानमन्त्री कार्यालयमा बुँदागत छलफल

डाक्टर केसीले अनसन सुरु गरेपछि प्रधानमन्त्री कार्यालयले उनका मागका विषयमा स्वास्थ्य तथा जनसंख्या मन्त्रालयका सचिव र सहसचिवहरुलाई बोलाएर बुँदागत छलफल सुरु गरेको छ ।

मंगलबार प्रधानमन्त्री कार्यालयका सचिव रामप्रसाद घिमिरेको संयोजकत्वमा डाक्टर केसीले उठाएका मागका विषयमा बुँदागत छलफल भएको हो । 

छलफलमा स्वास्थ्य तथा जनसंख्या मन्त्रालयका सचिव डाक्टर रोशन पोखरेल, शिक्षा मन्त्रालयका सचिव, स्वास्थ्य मन्त्रालयको नीति योजना तथा अनुगमन महाशाखा प्रमुख डाक्टर कृष्ण पौडेल लगायत सहभागी थिए ।

छलफलमा डाक्टर केसीसँग २०७७ साल असोज २४ गते भएका सहमति र त्यसमा भएका प्रगति सहित अहिले डाक्टर केसीले उठाएका मागका विषयमा बुँदागत रुपमा छलफल भएको प्रधानमन्त्री कार्यालयका एक कर्मचारीले जानकारी दिए ।

ती कर्मचारीका अनुसार डाक्टर केसीसँग हालसम्म भएका सम्झौताको प्रगति र अहिले उठाएका मागका विषयमा भइरहेका काम तथा प्रगित र गर्न सकिने कामका विवरण एकीकृत गरेपछि  केसीसँग वार्ता गर्ने लगायतका प्रक्रिया अगाडि बढ्ने छ ।