सुदुरपश्चिम सरकारमा जान छुटेनन् नेकपा एसका कुनै पनि सांसद

धनगढी । सुदुरपश्चिम सरकारको छैठौं पटक पुनर्गठनसँगै नेकपा एसका सबै प्रदेश सभा सदस्यहरुले  मन्त्री बन्ने अवसर पाएका छन् । शुक्रवार गरिएको पुनगर्ठनमा दुई प्रदेश सभा सदस्यले राज्मयमन्त्रीको भुमिका पाएपछि  एकीकृत समाजवादी पार्टीका १३ जना प्रदेश सभा सदस्यले सुदुरपश्चिम सरकारमा सहभागी हुने अवसर पाएका छन् ।

नेकपा पार्टीमा विवाद चर्किएकै बेला प्रदेशका मुख्यमन्त्री त्रिलोचन भट्टले २०७८ साल जेठ १४ गते मन्त्रीपरिषद पुर्नगठन गरेका थिए । सो समयमा भौतिक पुर्वाधार विकास मन्त्रीमा दीर्घ बहादुर सोडारी र राज्यमन्त्रीमा चुनकुमारी चौधरी, आन्तरिक मामिला तथा कानुन मन्त्रीमा पुर्णा जोशी, सामाजिक विकास मन्त्रीमा लाल बहादुर खडका, राज्यमन्त्रीमा मना कुमारी साउदलाई नियुक्त गरेको थियो ।

नेकपा एमाले विभाजन भई माधव कुमार नेपालको नेतृत्वमा एकीकृत समाजवादी पार्टी गठन गरिएको थियो । नेकपा एस प्रदेशमा सबै भन्दा ठुलो दल बनेपछि नेकपा एमाले रोजेका प्रकाश बहादुर शाह र अर्चना गहतराजले आर्थिक मामिला मन्त्री तथा राज्यमन्त्रीको जिम्मेवारीबाट राजीनामा दिएका थिए ।

२०७८ सालमा असोज १ गते आर्थिक मामिला मन्त्रीमा तारा लामा तामाङ र राज्यमन्त्रीमा माया तामाङ बोहरालाई नियुक्त भएका थिए ।

केन्द्रमा गठबन्धनको सरकार रहे पनि प्रदेशमा नेपाली काँग्रेस, जनता समाजबादी पार्टीको सरकारमा सहभागिता नभएको भन्दै विरोध भएको थियो । नेपाली काँग्रेसलाई सरकारमा समावेश गर्न मुख्यमन्त्री भट्टले मन्त्रीपरिषद २०७८ चैत २५ गते पुनर्गठन गरेका थिए । सो क्रममा आन्तरिक मामिला तथा कानुन मन्त्रीमा नेपाली काँग्रेसबाट रण बहादुर रावल, सामाजिक विकास मन्त्रीमा गोविन्द बहादुर बोहरा र सामाजिक बिकास राज्यमन्त्रीमा टेक बहादुर रैका नियुक्त गरेको थियो ।

यस्तै, एकीकृत समाजवादीबाट आर्थिक मामिला मन्त्रीमा प्रकाश बहादुर रावल र राज्यमन्त्रीमा अमर बहादुर साउद, भौतिक पूर्वाधार विकास राज्यमन्त्रीमा चुन कुमारीलाई हटाउँदै कुलविर चौधरीलाई नियुक्त गरिएको थियो ।

अहिले प्रदेश तथा प्रतिनिधी सभा सदस्यको निर्वाचन नजिकिएसंगै एकीकृत समाजवादी पार्टी छोड्दै पुनः नेकपा एमालेमा फर्कने लहर चलिरहेका बेला मुख्यमन्त्री भट्टले एसका दुई प्रदेश सभा सदस्यलाई राज्यमन्त्रीमा नियुक्त गरेका छन् । आर्थिक मामिला राज्यमन्त्रीमा बल बहादुर सोडारी र भौतिक पुर्वाधार राज्यमन्त्रीमा सुशिला बुढाथोकीलाई नियुक्त गरेको छ ।

यसअघि प्रदेश सरकार पहिलो पटक २०७४ साल फागुन ५ गते गठन भएको मन्त्रीपरिषदबाट एकीकृत समाजवादी पार्टीकी माया भट्टले उद्योग, पर्यटन, वन तथा वातावरण मन्त्रीको जिम्मेवारी सम्हालिसकेकी थिइन्  ।

एकीकृत समाजवादीमै रहेकी दुर्गा विकलाई पार्टीले संसदीय दलको प्रमुख सचेतक बनाएको थियो ।

एस छोड्दै प्रदेश सभा सदस्य

एकीकृत समाजवादी पार्टी रोजेका प्रदेश सभा सदस्यहरु पार्टी परित्याग गर्दै अन्य पार्टीमा प्रवेश गर्न लागेका छन् ।

एसबाटै आर्थिक मामिला मन्त्री बनेका तारा लामा तामाङ र भौतिक पुर्वाधार राज्यमन्त्री कुलबीर चौधरी नेकपा एमालेमा फर्केका छन् भने एकीकृत समाजवादी पार्टीकी प्रमुख सचेतक रहेकी दुर्गा विक नेकपा माओवादी केन्द्रमा प्रवेश गरेकी छिन् ।