आरजु देउवा कांग्रेसको समानुपातिक सूचिमा

धनगढी । कैलाली–५ सहित देशका विभिन्न स्थानबाट प्रत्यक्ष चुनावका लागि नाम सिफारिष गरिएकी कांग्रेस केन्द्रिय सदस्य आरजु राणा देउवाको नाम कांग्रेको प्रतिनिधिसभामा समानुपातिक सूचीमा पनि समावेस गरिएको छ ।

सोमबार नेपाली कांग्रेसले तयार पारेको समानुपातिक उम्मेदवारको बन्द सूचिमा आरर्जुको नाम समेत समावेस गरिएको हो ।

कैलाली–५ सहित देशका विभिन्न ५ ठाउँबाट प्रतिनिधिसभामा उम्मेदवारका रूपमा नाम सिफारिस भएकोमा उनको नाम कांग्रेसले समानुपातिक सूचिमा समेत राखेको हो ।

२०७४ मा आरजु कैलाली–५ बाटै प्रत्यक्ष निर्वाचन लडेकी थिइन् । उनलाई एमालेका नारदमुनि रानाले चुनाव हराएका थिए ।

मंसिर ४ गते हुने निर्वाचनका लागि निर्वाचन आयोगले आइतबार र सोमबार समानुपातिकतर्फ उम्मेदवारको नाम समेटिएको बन्द सूची बुझाउने मिति तोकेको थियो । एक पदाधिकारीका अनुसार आरजुसहित दुई सहमहामन्त्रीको नाम पनि समानुपातिकमा समेटिने भएको छ ।

सहमहामन्त्रीद्वय फरमुल्लाह मन्सुर र जीवन परियारलाई पनि समानुपातिकमा उठाइने ती पदाधिकारीले जनाए । त्यसैगरी पूर्वउपसभापतिद्वय विमलेन्द्र निधि र गोपालमान श्रेष्ठको नाम पनि समानुपातिकमा समेटिने भएको छ ।

कानुनबमोजिम प्रतिनिधिसभा र प्रदेशसभामा ४० प्रतिशत सदस्य समानुपातिक निर्वाचन प्रणालीबाट निर्वाचित हुने व्यवस्था छ ।

जसअनुसार प्रतिनिधिसभाका २७५ मध्ये ११० जना र सातवटै प्रदेशसभामा २२० जना सदस्य समानुपातिकतर्फबाट निर्वाचित हुन्छन् ।