नागरिक उन्मुक्ति पार्टीको धनगढीमा र्याली

धनगढी । मंसिर ४ गते हुने प्रतिनिधि तथा प्रदेश सभा निर्वाचनलाई लक्षित गरेर नागरिक उन्मुक्ति पार्टीले धनगढीमा र्याली निकालेको छ ।

कैलाली क्षेत्र नम्बर–५ प्रचारप्रसार समितिको आयोजनामा धनगढी स्थित मोतिचोकबाट निकालिएको र्याली धनगढी चौरा, सहिद गेट हुँदै तारानगरमा समापन हुने नागरिक उन्मुक्ति पार्टीका धनगढी नगर कमिटि अध्यक्ष दानबहादुर विष्टले बताए ।

चुनावी प्रचार/प्रसारका क्रममा सवै घर–घरमा जान नसकिएको हुँदा र्याली मार्फत मत माग्ने र पार्टीको प्रचार–प्रसार गर्न र्याली आयोजना गरिएको उनले बताए ।

र्यालीमा नागरिक उन्मुक्ति पार्टीका बरिष्ट नेता लक्ष्मण थारु, केन्द्रिय उपाध्यक्ष सुनिता चौधरी, प्रदेश कमिटि सदस्य मोहन शाही, क्षेत्रिय कमिटि अध्यक्ष निम चौधरी लगायत नेताको सहभागि छन् ।

नागरिक उन्मुक्ति पार्टीले कैलाली क्षेत्र नम्बर–५ को प्रतिनिधि सभा सदस्यमा नल्का चुनाव चिन्ह पाएका स्वतन्त्र उम्मेदवार जगदिश चौधरीलाई समर्थन गरेको छ । प्रदेशमा नागरिक उन्मुक्तिका आफ्नै उम्मेदवार रहेका छन् ।

गरिक उन्मुक्ति पार्टीका तर्फबाट क्षेत्र नम्बर–५ को प्रदेश सभा निर्वाचन क्षेत्र क मा श्रीराम चौधरी र प्रदेश सभा क्षेत्र ख मा गोठु चौधरीले उम्मेदवारी दिएका छन् । नागरिक उन्मुक्ति पार्टीको चुनाव चिन्ह ढकिया रहेको छ ।