आफै घर भत्काउने घरधनी बढ्दै

धनगढी । बजार क्षेत्रको सडक चौडा बनाउन धनगढी उप महानगरपालिकाले थालेको अभियानमा साथ दिएर घर भत्काउन दिने घर धनिको संख्या बढ्न थालेको छ ।

धनगढी उप महानगरपालिकाले कैलाली पुल देखि क्याम्पसरोड सम्मको सडक ३० मिटर बनाउन सडकको दायाँ–बायाँ भागको १५–१५ मिटर क्षेत्र खालि गरिरहेको छ ।

उप महानगरको सो योजनामा आइतबार थप एक जना घर धनिले आफै घर खालि गरी संरचना भत्काउन दिएका छन् ।

धनगढी उप महानगरपालिकाका ओभरसियर निर्मल देउवाका अनुसार आइतबार धनगढी एल.एनचौक स्थित प्रेमराज पाण्डेले पनि आफ्नो घर भत्काउन दिएका छन् । पोण्डेले यस अघि क्षेतिपुर्तिको माग गर्दै सर्बोच्चमा रिट दायर गरेका भएपनि आइतबार स्वइच्छाले घर भत्काउन दिएको ओभरसियर देउवाले बताए ।

आइतबार नै धनगढी उप महानगरपालिकाले जिल्ला प्रशासन अगाडी खानेपानीको जग्गामा निर्माण गरिएका टहरा बल प्रयोग गरी भत्काएको छ ।

धनगढी उप महानगरपालिकाका ओभरसियर निर्मल देउवाका अनुसार शुक्रबार सडकको क्षेत्राधिकार भित्र आफ्नो भवन परेपछि धनगढी–८ सेतोपुल स्थित शिवरानाले आफ्नो सटर भत्काउन दिएका थिए । धनगढीको सडक निर्माण गर्ने अभियानमा साथ दिन भन्दै उनले भाडामा दिएको सटर खालि गरेर स्वइच्छाले भत्काउन दिएका हुन् ।

त्यसैगरी धनगढी उप महानगरपालिकाको सडक निर्माण कार्यमा सघाउन भन्दै बिहीबार एलएनचौकका गम्भीरसिंह वम र छबिराज पन्तले पनि स्वइच्छाले घर खालिगरेर भत्काउन दिएका थिए ।

बिहीबार नै उप महानगरले मुख्य सडकमा रहेको आनन्द जोशीको घरमा बल प्रयोग गरी भत्काउने प्रयास गरे पनि जोशीले घर खालि गर्न १५ दिनको समय मागेका थिए । जोशी लगायत केही घर धनिले सडक विस्तारको काम रोक्न माग गर्दै सर्बोच्चमा रिट दायर गरेका थिए । हाल सम्म सर्बोच्चले सो रिट माथी सुनुवाई भने गरेको छैन ।

धनगढी उप महानगरपालिकाले शुक्रबार धनगढी उप महानगरपालिकाले क्याम्पसरोड स्थित सडकको क्षेत्राधिकार मिचेर बनाइएको एउटा निजी घरमा पनि डोजर लगाइएको थियो ।

उप महानगरले शुक्रबारनै कैलाली जनपुस्तकालयको व्यापारिक सटक पनि भत्काएको छ । यसैगरी सरकारी कार्यालय तर्फ हुलाक कार्यालयको टिकट घर र पर्खाल, डिभिजन वन कार्यालय धनगढीको पर्खालमा समेत डोजर लगाइएको छ ।

सडक निर्माण अभियानमा बजार क्षेत्रका अन्य घर धनिले पनि आफ्ना संरचना आफै खालि गरेर घर भत्काई दिन भन्दै निवेदन दिन थालेका ओभरसियर देउवाले बताए ।