सुदूरपश्चिममा संवेदनशील मतदान स्थल धेरै

धनगढी । आइतबार हुने निर्वाचनका लागि सुदूरपश्चिममा सवै तयारी पुरा भएको प्रदेश निर्वाचन कार्यालय धनगढीले जनाएको छ ।

सुदूरपश्चिम प्रदेशका एक हजार १ सय ६१ मतदान स्थलमा मतदान अधिकृत, कर्मचारी, मत पत्र र मत पेटिका पुगिसकेका प्रदेश निर्वाचन कार्यालय धनगढीका प्रमुख प्रेमराज भट्टले बताए ।

भट्टका अनुसार सुदूरपश्चिमका एक हजार १ सय ६१ मतदान स्थल मध्य ४ सय ५ मतदान स्थल मात्र भौगोलिक तथा सुरक्षाका दृष्टिले सामान्य स्थितमा राखिएका छन् । तर ७ सय ५६ स्थल भने सुरक्षाका दृष्टिले संवेदनशिल  र अति संवेदनशिल मतदान स्थलको सूचिमा राखिएका छन् । प्रदेशका ३ सय ५२ मतदान स्थल अति संवेदनशील र ४ सय ४ स्थललाई संवेदनशील मतदान स्थलको सूचिमा राखिएको छ ।

ती मतदान स्थललाई भौगोलिक दृष्टि र अन्य मानविय दृष्टिले संवेदनशिल स्थलमा राखिएका हुने । ‘सुदूरपश्चिमका एक हजार १ सय ६१ मतदान स्थल मध्य कम स्थल मात्रै सुरक्षाका दृष्टिले समान्य अवस्थामा राखिएका छन्,’ भट्टले भने, ‘तर आधा भन्दा बढी मतदान स्थल विभिन्न दृष्टिले अति संवेदनशील र संवेदनशील सूचिमा राखिएका छन्, त्यहाँ सोही अनुसार सुरक्षा बल परिचालन गरिएको छ ।’

सुदूरपश्चिम प्रदेश प्रहरी कार्यालयका अनुसार भौगोलिक अवस्था, सुरक्षा चुनौतीलगायतका आधारमा सुरक्षा निकायले मतदान स्थललाई वर्गीकरण गरेको छ । १६ प्रतिनिध तथा ३२ प्रदेश सभा निर्वाचन क्षेत्र रहेको सुदूरपश्चिममा दुई हजार १ सय ४६ मतदान केन्द्र निर्धारण गरिएका छन् । तीमध्ये ७ सय १० अति संवेदनशील, ७ सय ७८ संवेदनशील र ६ सय ५८ मतदान केन्द्रलाई सामान्य अवस्थामा राखेर सुरक्षा परिचालन गरिएको सुदूरपश्चिम प्रदेश प्रहरी कार्यालयका सूचना अधिकारी एसएसपी भोलाबहादुर रावलले बताए ।

सोही अनुसार प्रदेशमा साढे १७ हजार भन्दा बढी सुरक्षाकर्मी परिचालन गरिएको उनले बताए । निर्वाचनलाई शान्तिपुर्ण रूपमा सम्पन्न गर्न ११ हजार पाँच सय ५९ म्यादी प्रहरी, नेपाली सेना, सशस्त्र प्रहरी र नेपाल प्रहरी गरेर १७ हजार ८ सय ५९ सुरक्षाकर्मी परिचालन गरिएको सूचना अधिकारी रावलले बताए ।

निर्वाचनका बेला एक सय ७७ वटा मोबाइल टोली परिचालित हुने प्रदेश प्रहरी कार्यालयले जनाएको छ । सूचना अधिकारी रावलका अनुसार निर्वाचनका दिन २० वटा रिजर्भ टिम तयार पारी सो टिमलाई आवश्यकता अनुसार परिचालन गरिने छ ।

रावलका अनुसार निर्वाचनको दिन नेपाली सेना, सशस्त्र प्रहरी र नेपाल प्रहरी सहित म्यादी प्रहरी फरक–फरक ठाउँमा तैनाथ हुनेछन् ।  सूचना अधिकारी रावलका अनुसार निर्वाचनका लागि कैलालीमा दुई हजार आठ सय १२, कञ्चनपुरमा एक हजार छ सय ३२, बाजुरामा सात सय ४९, डोटीमा नौ सय ५३, डडेल्धुरामा नौ सय ३७, अछाममा एक हजार दुई सय ६८ म्यादी प्रहरी परिचालन गरिएका छन् ।

त्यसैगरी बझाङमा एक हजार एक सय ८८, दार्चुलामा आठ सय २९ र बैतडीमा एक हजार एक सय ९१ म्यादी प्रहरी परिचालन गरिएको उनले बताए ।