निर्वाचनको  तयारी पुरा, सुदुरपश्चिममा १६ प्रतिनिधि सभा र ५३ प्रदेश सभा सदस्य चुनिने

धनगढी । मंसिर ४ गते (भोलि) भोलि हुन लागेको निर्वाचनको तयारी पुरा भएको छ । सुदुरपश्चिमका  नौ वटै जिल्लामा निर्वाचनको तयारी पुरा भैसकेको राष्टिय निर्वाचन आयोग सुदुरपश्चिम प्रदेश कार्यालयले जनाएको छ ।

सुदुरपश्चिममा १६ प्रतिनिधि सभा र ३२ प्रदेश सभा सदस्यका लागि प्रत्यक्ष निर्वाचन हुदैछ । प्रत्यक्ष निर्वाचनकै क्रममा  नै समानुपातिकका लागि पनि मतदान हुनेछ ।

 कैलालीमा ५ प्रतिनिधि तथा १० प्रदेश सभा सदस्य सीटका लागि १ सय २६ जना चुनावि प्रतिष्पर्धामा रहेका छन् । प्रतिनिधि सभा तर्फ ५ सिटका लागि ४८ जना र प्रदेश सभा तर्फ १० सिटका लागि ७८ जना प्रतिष्पर्धामा रहेका छन् ।

प्रदेश निर्वाचन कार्यालय धनगढीका प्रमुख प्रेमराज भट्टका अनुसार कैलालीमा १३ वटै पालिकामा रहेका दुई सय ३७ मतदान स्थलका ६ सय २९ मतदान केन्द्रबाट  मतदान हुने छ । उनले मतदातालाई ढुक्क भएर मतदान गर्न आग्रह गरेका छन् । आफ्नो अमुल्य मतले देश निर्माण गर्न योग्य उम्मेदवार छनौंट हुने बताउँदै भट्टले भने, ‘बिहान ७ बजे देखि वेलुका ५ बजे सम्म सयम अनुकुल मतदान गर्न हुन मतदातालाई अनुरोध गर्दछु, कुनै लोभ लालच र प्रलोभनमा नपरी स्वविवेकले ढुक्क संग मतदान गर्न हुन अनुरोध छ ।’

कैलालीमा निर्वाचनका लागि दुई हजार आठ सय १२ सुरक्षाकर्मी परिचालन गरिएका छन् । मतदानका लागि कैलालीमा आठ वटा अस्थायी मतदान केन्द्र तय गरिएका छन् । प्रदेश निर्वाचन कार्यालयका अनुसार धनगढी उपमहानगरपालिका–१ को उपमहानगरपालिका कार्यालय भवन, धनगढीमै रहेको जिल्ला कारागार भवन, गोदावरी नगरपालिका–२ को वनदेवी मन्दिर र वडा नं ४ को महादेव मन्दिर परिसरलाई अस्थायी मतदान केन्द्र तोकिएको छ ।

यस्तै गौरीगङ्गा नगरपालिका–६ को बाह्रवन साझेदारी वन व्यवस्थापनको कार्यालय, वडा नं ८ को बडैपुर वडा कार्यालय, लम्कीचुहा नगरपालिका–३ को वडा कार्यालय र टीकापुर नगरपालिका–१ को सिटी हललाई पनि अस्थायी मतदान केन्द्र तोकिएको छ । अस्थायी मतदाता रहेका सेना, प्रहरी, निर्वाचनमा नखटिने कर्मचारी र कारागारका कैदीबन्दीले प्रतिनिधिसभाको समानुपातिक निर्वाचन प्रणालीमा मात्र मतदान गर्न पाउने व्यवस्था गरिएको छ ।

समानुपातिक मतदान गर्ने मतदाताको संख्या कैलालीमा चार हजार सात सय ७६ रहेको छ । कैलालीमा कुल मतदाता संख्या पाँच लाख ३५ हजार पाँच सय १४ रहेको छ ।