आज  सुदूरपश्चिममा १६ लाख मतदाता मतदान गर्दै

धनगढी । आज बिहान सात बजेदेखि प्रतिनिधि सभा र प्रदेश सभाका लागि निर्वाचन शुरु हुदैछ ।  प्रतिनिधि तथा प्रदेश सभा निर्वाचनका लागि सुदूरपश्चिममा १६ लाख ५६ हजार चार मतदाताले आज मतदानमा भाग लग्न पाउने छन् । ९ जिल्ला रहेको सुदूरपश्चिममा प्रतिनिधि सभाका १६ र प्रदेश सभाका ३२ निर्वाचन क्षेत्र छन् ।

प्रतिनिधि सभातर्फ कैलालीमा पाँच र कञ्चनपुरमा तीन निर्वाचन क्षेत्र छन् । पहाडी क्षेत्रका अछाममा दुई र डोटी, बझाङ, बाजुरा, बैतडी, दार्चुला, डडेलधुरामा एक÷एक निर्वाचन क्षेत्र छन् ।
सुदूरपश्चिममा निर्वाचन सुरक्षाका लागि १७ हजार ८ सय ५९ सुरक्षाकर्मी परिचलन गरिएका छन् । ती मध्य ११ हजार पाँच सय ५९ म्यादी प्रहरी, नेपाली सेना, सशस्त्र प्रहरी र नेपाल प्रहरी गरेर १७ हजार ८ सय ५९ सुरक्षाकर्मी परिचालन गरिएको सुदूरपश्चिम प्रदेश प्रहरी कार्यालय धनगढीका सूचना अधिकारी भोला रावलले बताए ।

 सुदूरपश्चिममा दुई हजार एक सय ४६ मतदान केन्द्र निर्धारण गरिएका छन् । ती मध्य सुरक्षाका दृष्टिले सात सय १० अति संवेदनशील, सात सय ७८ संवेदनशील र छ सय ५८ मतदान केन्द्र सामान्य सूचिमा राखिएका छन् ।