कैलालीमा सरकारी कोटाको धान खरिद सुरु

धनगढी । खाद्या व्यवस्था तथा व्यापार कम्पनिले सरकारले निर्धारण गरेको कोटा अनुसार मंगलबार देखि धान खरिद गर्न थालेको छ ।

खाद्य व्यवस्था तथा व्यापार कम्पनि लिमिटेडकी प्रदेश कार्यालय प्रमुख इन्जिला वस्नेतका अनुसार मंगलबार देखि कैलालीको मोहनपुर, टिकापुर र शत्तिबाट धान खरिद सुरु गरिएको हो ।

पहिलो दिन तीन वटै केन्द्रबाट एक हजार क्वीन्टल धान खरिद भएको छ । खाद्य व्यवस्था तथा व्यापार कम्पनिले कात्तिक १६ गतेको मोटा धानको न्युनतम मुल्य २ हजार ९ सय ६७ र मध्यम धानको मुल्य ३ हजार १ सय २८ कायम गरेको थियो । कात्तिकमै धानको समर्थन मुल्य निर्धारण गरिएको भएपनि धान खरिदको अधिकार नदिंदा खरिद प्रक्रिया सुरु हुन सकेको थिएन ।

कैलालीमा प्रमुख जिल्ला अधिकारीको अध्यक्षतामा बैठक बसी शक्रबार तीन स्थानबाट धान खरिद गर्ने निर्णय गरिएको थियो । कैलालीमा यस बर्षमा का लागि ४० हजार क्वीन्टल धान खरिद गर्न केन्द्रबाट स्वीकृति आएको प्रदेश कार्यालय प्रमुख बस्नेतले बताइन् ।

खाद्य व्यवस्था तथा व्यापार कम्पनिले २०७७ मा धानको समर्थन मुल्य मोटो धान प्रति क्वीन्टल २ हजार ७ सय ३५ र मध्यम धानको मुलय प्रतिक्वीन्टल २ हजार ८ सय ८५ तोकेको थियो । सो बर्ष कैलालीमा ६१ हजार मेट्रिकटन धान संस्थानले खरिद गरेको थियो ।

गत बर्ष  मोटोधानको मुल्य २ हजार ७ सय ५० र मसिनो धानको मुल्य दुई हजार ८ सय निर्धारण गरिएकामा कार्तिकमा आएको बाढीका कारण धान विग्रेको भन्दै खाद्य तथा व्यापार कम्पनिले धान खरिदनै गरेन ।

२०७७ मा कैलालीका ४ वटा स्थान (धनगढी, टिकापुर, जोशीपुर र भजनी) बाट खाद्य व्यवस्था तथा व्यापार कम्पनिले धान खरिद गरेको थियो ।