धनगढी ९ मा गोली चल्यो, सोधपुछका लागि एक जना नियन्त्रणमा

धनगढी । धनगढी उपमहानगरपालिका–९ मा  मंगलबार बिहान चोरी गर्न आएको समुह र स्थानीय विच भएको मुडभेड पछि गोली चलेको छ ।
गोली मानिसमा भने नलागेको प्रहरीले जनाएको छ । प्रहरीका अनुसार धनगढी–९ स्थित शिवरामनगर टोलमा लुटपाट गर्न आएका हतियार धारीको समुहलाई गाउलेले लखेटेका थिए । गाउँलेले घेरेपछि चोरले हवाई फायर गरेको हुन सक्ने जिल्ला प्रहरी कार्यालय कैलालीका प्रबक्ता प्रहरी नायव उपरिक्षक वेदप्रकाश जोशीले बताए । 
चोर र स्थानीय विच भएको मुडभेडमा स्थानीय प्रजापति विष्ट सामान्य घाइते भएका छन् । उनको कम्मरमा सामान्य चोट लागेको प्रहरी प्रबक्ता जोशीले बताए । घरमा लुटपाट गर्न आएका लुटेरासंग प्रतिकार गर्न खोज्दो विष्ट घाइते भएका हुन् । 
घटनामा संलग्न भएको आशंकामा प्रहरीले एक जनालाई नियन्त्रणमा लगेको छ । उनमाथी सोधपुछ भइरहेको प्रहरीले जनाएको छ । घटनास्थलबाट प्रहरीले गोलीका खोकाहरु समेत बरामद गरेको छ ।