नवजीवन ब्राण्डको चामल बजारमा ल्याउँदैछौं  : बम

एक बर्ष कार्यकाललाई कसरी मुल्याङ्कन गर्नु भएको छ ?

हामी निर्वाचित भइसकेपछि हाम्रो सवैभन्दा महत्वपुर्ण काम कञ्चनपुरमा रहेको बचत तथा ऋण सहकारी मर्जर प्रक्रिया अघि बढाएका छौं । नवजीवनको साधारणसभाबाट त्यसलाई हामीले पारित गरिसकेका छौ । अव सहकारी विभागबाट अनुमति लगेर त्यो प्रक्रिया टुङ्ग्याइने छ ।

संस्थालाई अघि बढाउन के–के गर्नु भयो ?

हामीले कोल्ड स्टोर निर्माणका लागि प्रदेश सरकारबाट ५ करोड बजेटका लागि पहल गरेका छौं । अहिले बजारमा तरलता अभाव भइरहेका वेला बैंक तथा लघुवित्तले ब्याज पनि बढाएका छन् । त्यसैगरी अघिल्लो कार्यसमितिले जमिन खरिद गरी गोदामका लागि  भवन निर्माण गरेको थियो । हामीले त्यसमा राईस मिल स्थापना गरी आफ्नै ब्राण्डको चामल बजारमा ल्याउने तयारी गरेका छौं । हामीले शेयर सदस्यको हितका लागि निरन्तर काम गरिरहेका छौं आगामी दिनमा ती सेवा सुबिधालाई निरन्तरता दिइने छ ।

हामीले गरेका १६ प्रतिबद्धता मध्य तीनवटा प्रतिबद्धता हामीले पुरा गरिसकेका छौं ।

शेयर सदस्यको हितमा हुने थप काम के–के भए त ?

हामीले शेयर सदस्यको हितमा थुप्रै काम गर्दै आएका छौं । आगामी दिनमा पनि त्यसलाई निरन्तरता दिइने छ । हामीले शेयर सदस्यको क्रिया खर्च वाफत १० हजार दिने गरेका थियौं । तर सो रकम न्युन भयो भन्ने सबैतिरबाट गुनासो आएपछि अहिले त्यसलाई शत प्रतिशत बढाएर २० हजार पु¥याएका छौं । गत बर्ष यस संस्थाका ७२ जना शेयर सदस्यको मृत्यु भएको रहेछ, उनीहरुका परिवारले यो सुविधा पाएका छन् ।

त्यसैगरी बिरामीको हकमा सामान्य प्रकारको बिरामीलाई १० हजार, मध्यम बिरामीलाई २० हजार, जटिल रोगका लागि ३० हजार उपचार खर्च दिने गरेका थियौं । अहिले त्यो ३० हजारलाई पनि बढाएर ३५ हजार बनाएका छौं ।

त्यसैगरी कुनै शेयर सदस्यको अंङ्ग प्रत्यारोपण गर्नुपरेमा त्यस्ता शेयर सदस्यलाई एक लाख रकम संस्थाले उपलब्ध गराउने गरेको छ । यो बर्ष मात्रै ७ जना शेयर सदस्यले त्यस्तो सेवा पाएका छन् । यी सेवा शेयर सदस्यले जीवनकालमा एक पटक मात्रै पाउने गर्दछन् ।

शेयर सदस्यको स्वास्थ्य रक्षा गर्नु हाम्रो पनि कर्तव्य हो । त्यही मर्मलाई आत्मसाथ गर्दै हामीले उपचार खर्च दिने गरेका हौं ।

नवजीवनका महिला शेयर सदस्यका लागि मातृत्व कार्यक्रम ल्याएका छौं । यसअघि एक पटक मात्रै मातृत्व सेवा दिने गरेकोमा यस पटकदेखि एक जना महिलालाई दुई पटक मातृत्व सेवा दिने गरेका छौं ।

त्यसकारण शेयर सदस्यले बर्षमा एक पटक आउने र हाजिर मात्रै लगाएर ७ सय लगेर जाने भन्ने अवस्था छैन । हामीले शेयर सदस्यको अपनत्व हुनेगरी सवै शेयर सदस्यलाई सेवा प्रदान गरेका छौं । जन्मदेखि मृत्युसम्म नवजीवन छ भन्ने अनुभति हुनेगरी हामीले शेयर सदस्यको हितमा काम गर्ने गरेका छौं ।

नवजीवन सहकारीका शेयर सदस्य मात्र नभई उनीहरुका सन्ततीहरुका लागि पनि हामीले सेवा दिने गरेका छौं । एसईई परिक्षामा उत्कृष्ट नतिजा ल्याउने तीन जना विद्यार्थीलाई चाँदीको मेडल सहित नगद पुरस्कार दिने व्यवस्था हाम्रो साधारणसभाबाट पारित भएको छ ।

त्यसैगरी सहकारीबाट ऋण लगेर निण्मित व्याज बुझाउने, समयमै ऋण तिर्ने, साधारणसभामा नियमित उपस्थित हुने शेयर सदस्यलाई पनि पुरस्कृत गर्ने योजना ल्याएका छौं ।

तपाईले तीन वटा प्रतिबद्धता पुरा भए भन्नुभयो, ती कुन कुन हुन् ?

हामीले प्रतिबद्धता गरेका मध्य कृषि तर्फ धाम खरिद गर्ने र बिक्री गर्ने कामलाई प्लान्ट बनाएर आफ्नै ब्राण्डको चामल ल्याउने योजना साधारण सभाबाट पारित भइसकेको छ । अब त्यो काम छिट्टै पुरा हुन्छ ।

नवजीवज सुदूरपश्चिमको मात्रै नभई देशकै उत्कृष्ट सहकारी हो । अब यसले अरु सहकारीलाई पनि संरक्षण गर्नुपर्छ भन्ने उदेश्यले हामीले मर्जर नीति अपनाएका छौं । त्यस अनुसार कञ्चनपुर स्थित सुदुरपश्चिम बचत तथा ऋण सहकारीलाई आफुमा गाभ्दैछौं । त्यो प्रक्रिया अन्तिम चरणमा पुगेको छ । त्यसका लागि कञ्चनपुरमा रहेको सहकारीले साधारण सभाबाट एकिकरणमा जाने निर्णय गरिसकेको थियो ।   नवजीवनको साधारण सभाले पनि  पारित गरिसकेको छ । प्रक्रिया पछि दुई वटै सहकारी संस्थाका पदाधिकारी सम्मिलित समिति बनाई कार्यविधि निर्माण गरिएको छ । सो कार्यविधिले सवै काम गरिसकेको छ ।

अव सहकारी विभागबाट स्वीकृति आउने छ । हामीले त्यो सहकारीसंग एकिकरण भन गरेका हैनौं । सो सहकारी संस्था नवजीवनमा विलय गराउने प्रक्रियामा अघि बढाएका छौं ।

क्षेत्र विस्तारको कार्यक्रम के छ  ?

यो बर्षको साधारण सभाबाट थप ११ स्थानमा शाखा विस्तार गर्ने निर्णय गरिएको छ । यसलाई सहकारी विभागले स्वीकृत गर्नुपर्ने हुन्छ । सहकारी विभागबाट स्वीकृत भएपछि हामी क्रमिक रुपमा त्यसलाई अघि बढाइने छ ।

तीन बर्ष अघिसम्म नवजीवनका ५ वटा मात्रै शाखा रहेकोमा अघिल्लो साधारण सभाले १० वटा सेवा केन्द्र बनाएको थियो । आगामी बर्ष त्यसलाई बढाएर २१ वटा क्षेत्रबाट सेवा दिने योजना बनाएका छौं ।

कहा कहाँ हुन्छन थप सेवा केन्द्र स्थापना ?

चुरेको सहजपुर, कञ्चनपुरको महेन्द्रनगरमा दुई वटा, कैलालीको बौनियामा, कञ्चनपुरको झलारी, बेलौरी, कैलालीको लम्की, बर्दियाको राजापुर र सोनाश्री बजारमा नयाँ सेवा केन्द्र स्थापना गरिनेछन् । त्यसैगरी नेपाल सरकाबाट स्वीकृति पाईसकेको काठमाण्डौंमा पनि अवलोकन गरी त्यहाँ कति शेयर सदस्य रहेका छन् भन्ने निक्र्याैल गरी काण्ठमाण्डौंको बानेश्वरमा पनि सेवा केन्द्र स्थापना गर्नेछौं ।

साधारण सभाबाट संरिक्षत पूजि फिर्ता गर्ने निर्णय भएको छ, यो कस्तो योजना हो र कसका लागि ?

नवजीवजमा रहेका ३० हजार ९ सय ४४ जना शेयर सदस्य मध्य जसले नवजीवनमा पैसा जम्मा गरेका छन् र ऋण लगेका छन्,  उनीहरुलाई सहकारीसँग कारोवार गरेर योगदान पुरयाएको पुरस्कार स्वरुप संक्षित पुजी फिर्ता गरिने हो । यसका लागि साधारण सभाले २ करोड ९ लाख रुपैया छुट्याइसकेको छ । 

नवजीवनले कमाएको पैसा मध्य २५ प्रतिशत जगेडा कोषमा ५ प्रतिशत कर्मचारी कोष तथा अन्य विभिन्न कोषमा विभाजन गरिसकेपछि बचेको पैसा लाई ६० र ४० का आधारमा ऋण लग्ने र बचत गर्ने सदस्यलाई प्रदान गरिने छ । जसले ऋण लगेको छ उसले संरक्षित पूजिको ४० प्रतिशतसम्म पाउँछ भने बचत गर्नेले ६० प्रतिशत पाउने छ । यसका लागि सहकारी विभागले पनि अनुमति दियसकेको छ ।

नवजीवनको आफ्नै ब्राण्डको चामल बजारमा ल्याउने प्रक्रिया कहाँ पुग्यो ?

यस अघिको नेतृत्वले जमिन किनेको थियो । सो जमिनमा तारवार लगाएर घेराबन्दी गर्ने काम भइसकेको छ । गोदाम निर्माणमा ६० लाख नवजीवन सहकारीले लगाएको छ, भने ४० लाख रुपैंया नेपाल सरकारले उपलब्ध गराएको अनुदानको रकम लगाएका छौं ।

हामीले अघिल्लो बर्षदेखि धान खरिद गर्न सुरु गरेका थियौं । अघिल्लो बर्ष धान किन्ने र बिक्री गर्ने काम मात्रै ग¥यौं । अहिले हामीले किनेको धानलाई प्लान्टेसन गरेर आफ्नै ब्राण्डको चामल बजारमा ल्याउने भनेर लागेका छौं । त्यसका प्लान्ट निर्माण गर्दै छौं । त्यसका लmागि २ करोढ लाख बजेट पनि छुट्याइएको छ । धान खरिद र चामल बनाउन हामीले कमिटी बनाएका छौं । सोही कमिटिले धान पिसानी गर्ने काम गर्ने छ ।

यस बर्ष नवजीवन ब्राण्को चामल मात्रै निकाल्ने छौं । तर अर्को बर्ष पिठो, तोरीको तेल र मसुरोका दाल पनि नवजीवनले बजारमा ल्याउने गरी तयारी गरेका छौं । आगामी बर्षदेखि नवजीवन ब्राण्डका ४ वटा उत्पादन बजारमा ल्याउने हाम्रो योजना रहेको छ ।

ती उत्पादन नवजीवनका सेवा केन्द्रमा सुपथ मुल्य पसल सञ्चालन गरी ३ सय ६५ दिन नै हामी हाम्रा शेयर सदस्य र सर्वसाधारणलाई सेवा दिने व्यवस्था गर्न लागेका छौं ।