सांसद अरुण चौधरी बाकेमा पक्राउ

काठमाडौँ । नागरिक उन्मुक्ति पार्टीबाट निर्वाचित सांसद अरुण कुमार चौधरीलाई प्रहरीले पक्राउ गरेको छ । सांसद चौधरीलाई बिहीबार दिउँसो बाँकेका कोहलपुर क्षेत्रबाट प्रहरीले पक्राउ गरेको हो ।

सुदुरपश्चिम प्रदेश प्रहरी कार्यालयको टोलीले क सांसद चौधरीलाई दिउसो २ बजेतिर कोहलपुर क्षेत्रबाट पक्राउ गरेको प्रहरी प्रवक्ता डिआइजी पोषराज पोखरेलले जानकारी दिए ।

प्रवक्ता पोखरेलले भने ‘पक्राउ परेका सांसद चौधरीलाई कैलाली ल्याइदैछ ।   उनलाई आज नै कैलाली बुझाउँछौं ।’

सांसद चौधरीकै २०७८ मा कैलाली क्षेत्र नं २ बाट प्रतिनिधिसभा सदस्यमा निर्वाचित भएका हुन् । चौधरी सार्वजनिक सम्पत्तिमा आगजनी गरेको मुद्दाका दोषी हुन् ।

कैलाली जिल्ला अदालतले १० वर्ष अघि आगजनी गरेको कसूरमा उनीमाथि ६ महिना कैद र ८ लाख जरिवाना गर्ने फैसला गरेको थियो । उक्त फैसला कार्यान्वयन भएको थिएन । यो बीचमा उनी सांसद बनेर आएपछि उनको फैसला कार्यान्वयन नभएको कुरा बाहिर आएको थियो ।

कैलाली जिल्ला अदालतका तत्कालिन न्यायाधीश बिष्णु सुवेदीको इजलासले उनलाई ‘आगो लगायो’ मुद्दामा दोषी ठहर गरेको थियो । कैलालीको तत्कालिन बलिया गाबिसका महादेव बजगाईले आफ्नो ट्रयाक्टरमा आगजनी गरेको भन्दै चौधरी सहितका विरुद्ध किटानी जाहेरी दिएका थिए । यही मुद्दामा पर्शुराम चौधरी र बीर बहादुर चौधरीलाई पनि अदालतले दोषी ठहर गर्दै कैद सजाय र जरिवाना गरेको थियो ।