फेरी सर्यो प्रदेश सभा बैठक

धनगढी । सुदूरपश्चिम प्रदेश सभा बैठक फेरी सरेको छ ।

प्रदेश सभा सचिवालयले सूचना जारी गर्दै आज दिउसो ४ बजेसम्मका बैठक सरेको जनाकारी दिएको छ । सुदूरपश्चिम प्रदेशका मुख्यमन्त्री राजेन्द्र रावलले विश्वासको मत लिनका लागि आज दिउँसो १ बजेका लागि बैठक बोलाइएको थियो । तर नागरिक उन्मुक्ति पार्टीले विश्वासको मत दिने निश्चय अझै नगरेकाले बैठकको समय सारिएको हो ।

नागरिक उन्मुक्ति पार्टीका ७ जना सांसद काठमाडौंमा छन् । मुख्यमन्त्री राजेन्द्रसिंह रावलले विश्वासको मत लिने आज अन्तिम दिन हो । नागरिक उन्मुक्ति पार्टीका सांसदले मत नदिए रावल नेतृत्वको सरकार ढल्छ । नागरिक उन्मुक्तिले आफ्ना नेता रेशम चौधरीको रिहाइ वा रिहाइको लिखित प्रतिबद्धता नगर्दासम्म विश्वासको मत नदिने अडान राखिरहेको छ ।

५३ सदस्यीय सुदूरपश्चिम प्रदेशसभामा माओवादीका ११, एमालेका १०, नाउपाका ७ र राप्रपाका १ जना सांसद छन् । नाउपाले विश्वासको मत नदिएको अवस्थामा सरकारलाई बहुमत (२७) पुग्दैन ।

नागरिक उन्मुक्ति पार्टीकी अध्यक्ष रञ्जिता श्रेष्ठ चौधरीले आफूहरूको माग पूरा नभएसम्म सरकारलाई विश्वासको मत नदिने अडान कायम रहेको बताइन् । उनले केही समयअगाडि सामाजिक सञ्जालमा सुदूरपश्चिमका ७ सांसद सहितको तस्बिरसमेत सामाजिक सञ्जालमा राखेकी छिन् ।

सुदूरपश्चिमका सांसद खुशीराम चौधरीले समेत आफूहरू पुरानै अडानमा रहेको र विश्वासको मत पाउने÷नपाउने कुरा सरकारको हातमा रहेको बताए ।