सुदूरपश्चिम आएका प्रधानमन्त्री प्रचण्ड सिधै लेखराजको घरमा

धनगढी । प्रधानमन्त्री पुष्पकमल दाहाल प्रचण्ड आइतबार सुदूरपश्चिम आएका छन् । कञ्चनपुर सिथत सुदूरपश्चिम विश्वविद्यालयको दीक्षान्त समारोहमा उपस्थित हुन सुदूरपश्चिम आएका प्रधानमनत्री प्रचण्ड कञ्चनपुर जान अघि नेकपा एमालेका सचिव तथा सुप इन्चार्ज लेखराज भट्टको घरमा गएका छन् ।

नेकपा विभाजन भई एमाले र माओबादी केन्द्र अलग अलग हुँदा माओबादी पृष्टभुमिका लेखराज भट्ट नेकपा एमालेतिर लागेका थिए । भट्ट एमालेमा गएपछि प्रधानमन्त्री प्रचण्डसंग उनको संबन्ध बिग्रीएको थियो । दुई नेता विच आरोप प्रत्यारोप पनि चलेको थियो । तर आइतबार प्रधानमन्त्री प्रचण्ड एकाएक उनै भट्टको घरमा पुगेपछि अनेक अड्कलबाजी हुन थालेका छन् ।

कतिपयले लेखराज भट्ट नेकपा माओबादी केन्द्रमा जाने तयारीमा रहेका टिप्पणी गर्न थालेका छन् भने कतिपयले लेखराजलाई फकाउन प्रधानमन्त्री प्रचण्ड उनको घरमा गएका हुन सक्ने अड्कलबाजी गर्न थालेका छन् । तर अहिले सम्म त्यसको यथार्थ बाहिर आइसकेको छैन । 

प्रधानमन्त्री प्रचण्डले भने विगत ४० बर्ष देखि लेखराज भट्टको भरमा आफ्नो साइनो रहेका कारण आफुलाई सोघरमा प्रवेस गर्ने इच्छा लागेको बताएका छन् । ‘यो घरसँग मेरो ४० वर्षदेखिको सम्बन्ध ,। यो घरको माथि एउटा कोठा छ, त्यहाँ म बस्थेँ,’ भट्टसँग भेटघाट गरेपछि पत्रकारहरूसँग संक्षिप्त कुराकानी गर्दै प्रधानमन्त्री दाहालले भने, ‘त्यसैले यो घर मेरो पनि हो भन्ने लागेर म आज यहाँ आएको हुँ, बाँकी कुरा लेखराजजी राजनीतिक व्यक्तित्व भएकोले समसामयिक राजनीतिक घटनाक्रमबारे छलफल हुने नै भइहाल्यो ।’

प्रधानमन्त्री प्रचण्डले एमाले सचिव भट्टसँग राजनीतिक घटनाक्रमलगायतका विषयमा पनि कुराकानी गरेका छन् । भट्ट पहिले माओवादीमै थिए । नेकपाको एकीकरणबारे सर्वोच्च अदालतको आदेशपछि उनी एमालेमा लागेका हुन् ।

भट्टले पनि प्रधानमन्त्री प्रचण्डलाई घरमा स्वागत गरेको बताए । आफूले घरमा प्रधानमन्त्री दाहाललाई स्वागत गरेको र चिया खाएर प्रधानमन्त्री दाहाल गएको उनको भनाइ थियो । यो भेटघाट तपाईंलाई माओवादीमै फर्काउने रणनीति हो ? भन्ने पत्रकारको प्रश्नमा जवाफ दिँदै एमाले सचिव भट्टले भने, ‘यो त अलग विषय हो, त्यो विषयमा हामीबीच अहिले कुनै छलफल नै भएन। त्यो अहिले सम्भावना पनि छैन ।’