१ सय २२ जना विपन्न महिलालाई राहत वितरण

धनगढी । कैलालीका एक सय २२ जना अति विपन्न महिलालाई वृहत राहत सामग्री वितरण गरिएको छ ।

आघात पछिको सशक्तिकरणको बाटो ‘‘हाम्रो सहकार्य’’ परियोजनाले कैलालीको भजनी नगरपालिका, कैलारी गाउँपालिका र धनगढी उप महानगरपालिकाका गरी एक सय २२ जना अति विपन्न महिलालाई वृहत राहत सामग्री वितरण गरेको हो ।

परियोजना फिनल्याण्ड सरकारको आर्थिक सहयोग र यू.एन वमनको प्राबिधिक सहयोग तथा जुरी नेपाल र दलित महिला संघको संयुक्त साझेदारीमा सञ्चालन भइरहेको छ ।

परियोजनाले कोभीडबाट प्रभावित, पविार गुमाएका, रोजगारी गुमाएका वा अन्य समस्याले आर्थिक रुपमा आघातमा परेका परिवारलाई तत्कालिन र दिर्घकालिन रुपमा सहयोग गर्दै आएको छ । तत्कालिन सहयोगमा खाद्यान्न, ग्यास चुलो, लगायत अत्यावश्य सामग्री परियोजनाले वितरण गरेको फेडोका प्रदेश संयोजक तारक टमाटाले बताए ।

तत्कालिन राहत पछि ती परिवारलाई रोजगारीमा जोड्ने थप कार्यक्रम सञ्चालन गरिने संयोजक टमाटाले बताए । परियोजनाले जेठ १३ गते कैलारी गाउँपालिका १, २, ३ र ४ नम्बर वडाका ३५ जना, १३ गतेनै धनगढी–१२ का २२ जनालाई वृहत राहत प्याकेज वितरण गरेको थियो । सो राहत सामग्री वडा अध्यक्षको रोहबरमा वितरण गरिएको थियो ।

यसैगरी जेठ १४ गते भजनी नगरपालिका वडा नम्बर–१ र २ का ३५ जना अति विपन्न महिलालाई वृहत राहत प्याकेज वितरण गरेको छ । सो कार्यक्रममा भजनी नगरपालिकाका मेयर, उप मेयर र वडा अध्यक्ष समेत सहभागि रहेका थिए ।

परियोजनाले जेठ १५ गते धनगढी–१ का ३० जनालाई वृहत राहत प्याकेज वितरण गरेको संयोजक टमाटाले बताए । वृहत राहत प्याकेजमा चामल, दाल -मसुरो र चना_, नून, तेल, चीनि, ग्याँस चुलो, ग्याँस सिलिण्डर, लुगा धुने सर्फ, नुहाउने साबुन, स्वास्थ्य सामग्री, सेनेटरी प्याड लगायतका अत्यावश्यक सामग्री वितरण गरेको हो ।