बडीमालिकामा कृषि एम्बुलेन्स सञ्चालन

धनगढी । बाजुरा स्थित बडीमालिका नगरपालिकाले कृषि एम्बुलेन्स सञ्चालमा ल्याएको छ । किसानले उत्पादन गरेका कृषि उपज सुरक्षित तवरले बजार र उपभोक्तासम्म पु¥याउने उद्देश्यले  कृषि एम्बुलेन्स सञ्चालनमा ल्याएको बडीमालिका नगरपालिकाले जनाएको छ ।

कृषकका उत्पादनले सही समयमा बजारसम्म पहुँचको अवस्था सिर्जना गर्न नगरपालिकाले कृषि एम्बुलेन्स सेवा सञ्चालन गरेको बडिमालिका नगरपालिकाका प्रमुख अमर खड्काले बताएका छन् । कृषकलाई आत्मनिर्भर बनाउन उत्पादित बजारको सरल र सहज पहुँचको आवश्यकता रहेको जनाउँदै नगरले कृषकमैत्री कार्यक्रममा जोड दिएको नगर प्रमुख खड्काको भनाइ रहेको छ ।

कृषि एम्बुलेन्स सेवाको एक कार्यक्रमका असार ५ गतेबाट आधिकारिक रूपमा सञ्चालनमा ल्याइएको हो । कृषि एम्बुलेन्स सेवा सञ्चालनमा आएपछि कृषकका बारीमै कृषि एम्बुलेन्स पुग्ने छ र कृषकले उत्पादन गरेका तरकारी सङ्कलन तथा बिक्री केन्द्रसम्म ढुवानी गर्नेछ । तरकारी खेती गर्ने कृषकलाई ढुवानी गर्ने साधन नहुँदा धेरै समस्या हुने गरेको थियो, अब उक्त समस्या नहुने भएको हो । सडक पहुँच पुगेका सबै टोल र बस्तीमै पुगेर तरकारी सहीतको उत्पादन संकलन गर्ने र बजारसम्म सहुलियत मूल्यमा ढुवानी सहायता दिने उदेश्य पालिकाले राखेको छ ।

बडीमालिका जिल्लाका नौ मध्ये बेमौसमी तरकारी उत्पादन गर्नेमा अग्रस्थानको पालिका हो । बाजुरा सदरमुकाम आउने आधा बढी तरकारी पालिका भित्रै उत्पादन हुने गरेको छ । किसानले बारीमा कुनै न कुनै खेती गरेको अवस्था छ, थोरै भएपनि उत्पादन छ, त्यो उत्पादनलाई बजारसँग जोड्ने कुरा समस्या थियो, अब अन्त्य हुने कृषि ज्ञान केन्द्रका सूचना अधिकारी मिनप्रसाद जैशीले बताएका छन् । उत्पादन थोरै हुने, ढुवानीमा बढी खर्च हुने समस्या थियो, कृषि एम्बुलेन्सले त्यो समस्या हट्ने र किसानलाई खेती गर्न हौसला मिल्ने जैशीको भनाई छ ।

बाजुरामा अझै ८० प्रतिशत बढीले कृषि पेशा नै गर्ने गरेका छन् । तर ती सबै गुजाराका लागि मात्रै सीमित छन् । न प्रविधी मैत्री कृषि खेतीको विकास छ । बेमौसमी खेती गर्ने र तरकारी खेती गर्न रुचि राख्नेहरुका लागि पनि बजारको ग्यारेन्टी नहुँदा समस्या थियो, त्यो समस्या अन्त्यका लागि पालिकाले सानो प्रयास थालेको उपप्रमुख नन्दा कुमारी थापाले बताएकी छन् । बडीमालिकामा तरकारी खेती र त्यसैमा आलुका लागि धेरै संभावना बोकेको छ ।