बैतडीमा भयावह बन्दै लम्पी स्किन रोग, कम्तिमा ५ सय पशु मरेको आशंका

धनगढी । बैतडीमा लम्पी स्किन रोगले भयावह रुप लग्न थालेको हो ।

गत असोज देखि पुशमा देखिन थालेको लम्पी स्किन रोगका कारण हाल सम्म कम्तिमा ५ सय पशु मरेको आशंका गरिएको छ भने, ८ हजार भन्दा बढी पशु चौपायमा लम्पी स्किन रोग लागेको अनुमान गरिएको छ ।

बैतडीमा लम्पी स्किन रोगको संक्रमणका कारण हाल सम्म १ सय ३५ बाच्छाबाच्छी, १ सय ७६ गाई, १ सय ३२ गोरु र ३० भैँसी मरेको पशु सेवा विज्ञ केन्द्र बैतडीले जनाएको छ । तर यो संख्या एकिन नभएको र रोगका कारण मर्ने पशु चौपायको संख्या अझै बढ्न सक्ने कार्यालयले जनाएको छ । कार्यालयका अनुसार बैतडीका कम्तिमा आठ हजार  भन्दा बढी पशु चौपायमा लम्पी स्किनको संक्रमण रहेको भेटेरीनरी अस्पताल तथा पशु सेवा विज्ञ केन्द्रका प्रमुख गुमानीदत्त पन्तले बताए । ‘अहिले सम्म कार्यालयमा आएको तथ्याङ्क अनुसार ८ हजार २ सय २६ पशु चौपाय लम्पी स्किन रोगबाट संक्रमित भएको पाइएको छ,’ कार्यालय प्रमुख पन्तले भने, ‘तर यो एकिन तथ्याङ्क हुनै लम्पी स्किनबाट अझै धेरै चौपाय संक्रमित भएका हुन सक्दछन् ।’

कार्यालयका अनुसार बैतडीमा हाल सम्म दुई हजार ३ सय ४८ बाच्छाबाच्छी, दुई हजार ९ सय ६० गाई, दुई हजार २ सय ८० गोरु र ६ सय ४५ भैसी संक्रमित भएका छन् ।