यातायात कार्यालय धनगढीका तत्कालीन प्रमुख हित ३ जनाविरुद्ध भ्रष्टाचार मुद्दा दायर

धनगढी । यातायात व्यवस्था कार्यालय धनगढीका तत्कालित कार्यालय प्रमुख लक्ष्मण शाह र दुई जना कम्प्यूटर अपरेटर विरुद्ध अख्तियार दुरुपयोग अनुसन्धानको कार्यालयमा मुद्धा दायर गरिएको छ ।

परीक्षामा फेल भएका तथा परिक्षामा सहभागी नै नभएकाहरूलाई सवारी चालक अनुमति पत्र (लाइसेन्स) दिएको आरोपमा उनिहरु विरुद्ध अख्तियारमा मुद्दा दायर भएको हो । अख्तियार दुरुपयोग अनुसन्धान आयोगले यातायात व्यवस्था कार्यालय धनगढीका तत्कालीन प्रमुख लक्ष्मण शाह, तत्कालीन सहायक कम्प्युटर अपरेटर नरेन्द्रकुमार कठरिया र पवनकुमार रावलविरुद्ध विशेष अदालतमा मुद्दा दायर गरेको हो ।

कार्यालय प्रमुख शाहले प्रयोगात्मक परीक्षामा फेल भएका परीक्षार्थीहरुलाई उत्तीर्ण गराएको र लिखित परीक्षामा उत्तीर्ण नभएका र लिखित परीक्षामा समावेश नभएका सयौं परीक्षार्थीहरुलाई प्रयोगात्मक परीक्षामा सामेल गराई उत्तीर्ण गराएको अख्तियारका प्रवक्ता भोला दाहालले बताए । आर्थिक वर्ष २०७८/७९ मा शाही यातायात व्यवस्था कार्यालय धनगढी प्रमुखका रुपमा कार्यरत रहेका बेला उक्त बदमासी भएको अख्तियारले जनाएको छ ।

शाहीले आफ्नो आधिकारिक युजर आइडी प्रयोग गरी वर्ग A, B, C/C1, K, / J1  का सवारी चालक अनुमतिपत्रको लागि लिइएका लिखित परीक्षाहरुमा अनुत्तीर्ण भएका १ सय ८० जना परीक्षार्थीहरूको लिखित परीक्षाको परिणाम फेरबदल गरी उत्तीर्ण जनाई लिखित परीक्षाको नतिजा प्रतिवेदनमा विवरण प्रविष्ट -अपलोड_ गरेको र त्यस क्रममा निजले प्रविष्ट -अपलोड_ गरेका उक्त १ सय ८० जना परीक्षार्थीहरूमध्ये १३ जनाको उत्तरपुस्तिकाहरूमा परीक्षकले लेखेको नतिजा/प्राप्तांकलाई रि–राइट, ओभर–राइटसमेत गरी सच्याएको, वर्ग A, B, E, G / K का सवारी चालक अनुमतिपत्रको लागि लिइएका प्रयोगात्मक परीक्षामा उपस्थित नै नभएका ३९ जना, फिल्ड प्रतिवेदनको नतिजा/प्राप्तंकमा रि–राइट, ओभर–राइटसमेत गरी उत्तीर्ण बनाइएका २३ जना र परीक्षामा अनुत्तीर्ण भएका २ सय २१ जना गरी जम्मा २ सय ८३ जना परीक्षार्थीहरूको फिल्ड प्रतिवेदनको नतिजा फेरबदल गरी उत्तीर्ण जनाई तोकिएको प्रणालीमा प्रविष्ट गर्ने काम गरेको र उक्त २ सय ८३ जनामध्ये २१ जना परीक्षार्थीहरूको नतिजालाई आफैंले स्वीकृत गर्ने कामसमेत गरेको आयोगले जनाएको छ ।