धनगढी मेनरोडमा व्यवस्थित  शहरी सडक निर्माण शुरु

धनगढी । सुदुरपश्चिम प्रदेशको राजधानी धनगढीको मेनरोड स्थित कैलाली पुलदेखि क्याम्पसरोडमा रहेको हुलाकी सडकको जिरो प्वाइन्टसम्म सुविधा सम्पन्न शहरी सडकको निर्माण कार्य शुरु भएको छ । २ किलोमीटर २ शय ८४ मीटर  क्षेत्रमा बन्न लागेको सडक तीस मीटर फराकिलो हुनेछ ।

धनगढी उपमहागरपालिकाको मेयरमा गोपाल हमाल निर्वाचित भएपछि धनगढी उपमहानगरपालिका र सुदुरपश्चिम प्रदेश सरकारबीच बनेको राम्रो समन्वयमा धनगढीमा व्यवस्थित शहरी सडक बन्न लागेको हो । धनगढी उपमहानगरपालिकाले सडक क्षेत्र खाली गराएपछि प्रदेश सरकारले सडक निर्माणको रकम छुट्याएको हो ।  

सुदुरपश्चिम प्रदेशका भौतिक पुर्वाधार बिकास मन्त्री प्रकाश बहादुर देउवाले मंगलबार सिलान्यास गरेसँगै सडकको निर्माण कार्य शुरु भएको छ । धनगढी उपमहानगगरपालिकाले सडक क्षेत्र खाली गराएपछि भौतिक  पुर्वाधार मन्त्रालयले सडकको निर्माण गरिरहेको छ ।

शहरीकरण बढ्दै गएकोले शहरमा आवश्यक पर्ने सबै सुविधा राखेर डक निर्माण  गर्न लागिएको भौतिक पुर्वाधार बिकास मन्त्रालयका प्रदेश सचिव प्रेमदत्त भट्टले बताए । “धनगढी शहरको रुपमा बिकास भैरहेको छ । त्यसैले व्यवस्थित शहरको सडकका लागि आवश्यक फुटपाथ, साइकल लेन सहितका सबै खालका सुविधा समेटेर सडक निर्माण गरिन लागेको छ ।” भट्टले भने  “पानीको पाइप बिछ्याउन,  बिजुली र टेलिफोनको तार भुमिगत राख्न मिल्ने गरि  सडक बनाउन लागेका छौं ।”

सडक चार लेनको हुनेछन् ।  चार लेन सडकको बीचमा २ मीटर लाइट सहितको मेरिडियम रहने प्राविधिक कार्यालयका दुर्गा अवस्थीले बताए ।  अवस्थीका अनुसार चार लेनको दुवैतिर साढे दुई मीटरको साइकल लेन, दुवैतिर ३ दशमलब ८ मीटरको फुटपाथ रहने छ । सडकको दुवैतिरको छेउमा बिजुलीका पोल,  खानेपानीका पाइप अन्डरग्राउण्ड बिस्तार गर्न साढे एक÷साढे एक मीटरमा युटिलिटी कोरिडोर बनाइनेछ ।

के एस कन्स्ट्रक्सन प्रा. लि. ले ५१ करोड ६८ लाख ७८ हजारमा निर्माण शुरु गरेको उक्त सडक २०८२  बैशाख २६ गते सम्म निर्माण सम्पन्न गरिसक्ने लक्ष्य रहेको छ । तोकिएको समयभन्दा अगाडि नै स्तरीय सडक निर्माण गर्ने निर्माण कम्पनीका सञ्चालक इन्जिनियर भीम पालले बताए । “म पनि यहाँको स्थानीय नै हो । अहिले निर्माण व्यवसायीले समयमा काम सक्दैनन् भन्ने सर्वसाधारणको बुझाई छ । आक्रोश पनि छ” उनले भने, “धनगढीको मुख्य सडक तोकिएको समय अगावै गुणस्तरीय निर्माण गरेर देखाउने प्रतिवद्धता गर्दछु ।”

धनगढी उपमहानगरपालिकाका प्रमुख गोपाल हमालले घरधनीहरूले नीजि संरचना हटाएर र प्रदेश सरकारले धनगढी उपमहानगरले राखेको सडक निर्माणको प्रस्ताव स्वीकार गरेर धनगढीलाई समुन्नत शहर बनाउने उपमहानगरपालिकाको लक्ष्यमा सहयोग गरेको बताए ।

“धनगढीको विकास हुन्छ भन्ने मनसायले ४ सय २८ घरहरू भत्काएर नगरवासीले सहयोग गर्नुभएको छ” उनले भने, “पूर्व मुख्यमन्त्री त्रिलोचन भट्ट, भौतिक पूर्वाधार विकास मन्त्री दीर्घबहादुर सोडारी र तत्कालिन आर्थिक मामिला मन्त्री प्रकाश रावल ज्यूप्रति पनि आभार व्यक्त गर्न चाहान्छु । प्रदेश सरकारले उपमहानगरको प्रस्ताव स्वीकार गर्यो र स्थानीयले संरचान हटाएर सहयोग गर्नाले सडक निर्माण सम्भव भएको हो ।”

धनगढीको मुख्य सडकसँगै अन्य रणनीतिक रुपले महत्वपूर्ण ठानिएका सडकको काम पनि आगामी आर्थिक वर्षबाट अगाडि बढ्ने भएको छ । मुख्य सडकलाई आधुनिक र नमुना बनाउन बजेटको कमि हुन नदिने प्रदेश सरकारले जनाएको छ । धनगढीलाई आधुनिक सहर बनाउन मुख्य सडकसँगै नगर क्षेत्रका अन्य सडकमा पनि पर्याप्त बजेटको व्यवस्था गरिएको भौतिक पूर्वाधार विकास मन्त्री प्रकाशबहादुर देउवाले बताए ।

“कैलाली पुलदेखि हुलाकी सडकको शून्य विन्दुसम्म नमुना सडक निर्माण हुन्छ । सडकको काम पनि समयमै सकिनेछ” उनले भने, “यो सडक निर्माणमा स्रोतको अभाव हुन दिइने छैन । धनगढीका पुराना र रणनीतिक महत्वका सडकमा पनि यो पटक प्रदेश सरकारले बजेट हालेको छ ।”

आफ्ना भवनहरु  हटाएर  सडक निर्माणमा सहयोग गरेको भन्दै धनगढी उपमहमानगरपालिकाले ४ शय २८ जनालाई मंगलबार नै सम्मानित गरेको छ । धनगढी उपमहानगरपालिकाले २०७९ मंसिरमा सडक छेउका संरचना हटाउन शुरु गरेको थियो ।

धनगढी उपमहानगरपालिकाले भने एक वर्षभित्र सडक निर्माणको काम सम्पन्न गरिए निर्माण व्यवसायी, प्रदेश सरकारका मन्त्री र निर्माणको नियमन गर्ने अधिकारीहरूलाई रथारोहरणसहित नागरिक अभिनन्दन गर्ने घोषणा गरेको छ ।