मालाखेती अस्पतालका स्वास्थ्यकर्मीले पाएनन् तलव

धनगढी । कैलालीको अत्तरियास्थित मालाखेती अस्पतालमा कार्यरत स्वास्थ्यकर्मीहरूले ७ महिनादेखि तलब नपाए पछि दैनिकी चलाउन सकस भएको गुनासो गरेका छन् । स्थानीय तहबाट आएका कर्मचारीहरुले तलब पाए पनि संघीय सरकारले खटाएका स्वास्थ्यकर्मीले तलब पाउन सकेका छैनन् । नगर अस्पतालको रुपमा सञ्चालित मलाखेती अस्पतालमा पर्याप्त भौतिक पूर्वाधार नहुँदा स्वास्थ्य उपचारमा समेत समस्या हुँदै आएको छ ।

प्रदेशको राजधानी क्षेत्रमा रहेको अस्पताललाई ट्रमा हस्पिटल बनाउन सकिए दुर्घटना परेर घाइते भएकाहरुको उपचार गर्न सहज हुने अस्पताल व्यवस्थापन समितिका अध्यक्ष डाक्टर नरबहादुर मौनीले बताए । ‘मालाखेती अस्पताललाई ट्रमा हस्पिटलको रुपमा विकास गर्नुपर्छ। प्रदेशको राजधानीमा रहेको अस्पतालको क्षमता विकास गर्नु आवश्यक छ’ उनले भने, ‘प्रदेश सरकारले मालाखेती अस्पताललाई प्रदेशकै ट्रमा हस्पिटल बनाउनुपर्छ ।’

अत्तरियाको मालाखेती प्राथमिक स्वास्थ्य केन्द्रलाई २०७० मा मालाखेती अस्पताल नामाकरण गरिएको हो । १५ शैय्याको नगर अस्पतालको रुपमा सञ्चालित मालाखेती अस्पतालमा एक जना विशेषज्ञसहित चार जना चिकित्सक कार्यरत छन् ।