कर्मचारी फिर्ता पठाउन खोजेपछि  धनगढी उपमहानगरपालिकाका आधारभुत स्वास्थ्य सेवा प्रभावित

धनगढी । धनगढी उपमहानगरपालिकाले समायोजनमा आएका स्वास्थ्यका  कर्मचारीहरुलाई फिर्ताको पत्र दिएपछि पालिकामा रहेका आधारभुत स्वास्थ्य केन्द्रहरुमा स्वास्थ्य सेवा प्रभावित भएको छ ।

समायोजनमा आएका कर्मचारीहरुका तीन दर्जन कर्मचारीहरुलाईलाई हाजिर हुन नदिएपछि सोमबार अधिकांश आधारभुत स्वास्थ्य संस्थाहरुमा सेवा प्रभावित भएको छ । करिब तीन दर्जन कर्मचारीहरुले हजिर  गर्न नपाएपछि  आधारभुत स्वास्थ्य  सेवामा एकदेखि बढीमा दुई जना कर्मचारी मात्र हुदा सेवाग्राहरुले स्वास्थ्य सेवा पाउन सकेनन् ।

  आधारभुत स्वास्थ्य सेवा पालिकाहरुको एकल अधिकार हो ।  जनताकोलसबै भन्दा नजीकमा रहने आधारभुत स्वास्थ्य केन्द्रहरुले खोप सेवा, एकीकृ नवजात तथा बालरोग व्यवस्थापन,  पोषण सेवा, गर्भवती सेवा, प्रसव तथा सुत्केरी सेवा, गर्भपतन तथा प्रजनन स्वास्थ्य सेवा, मातृ नवजात शिशु तथा बाल स्वास्थ्य सेवा,  सरुवा रोग,  नसर्ने रोग,  लागु पद्धार्थ दुव्र्यसन, जेष्ठ नागरिक स्वास्थ्य सेवा, स्वास्थ्उ प्रवद्र्धन सेवा र आयुर्वेद तथा परम्परागत स्वास्थ्य सेवा  प्रदान गर्ने गर्दछन् ।

कर्मचारी हाजिर हुन नदिएपछि प्रत्येक स्वास्थ्य संस्थामा एक वा दुई कर्मचारीले  मात्र  सेवा दिनु पर्दा सेवाग्राहरु मारमा परेका हुन् । धनगढी उपमहानगरपालिमा स्वास्थ्यका ५६ जना स्थायी कर्मचारी र १५ जना करारका  कर्मचारी रहेका छन् ।

धनगढी उपमहानगरपालिका वडा नम्बर ७ बेलीमा रहेको स्वास्थ्य प्रवद्र्धन केन्द्र एक जना स्वास्थ्यकर्मीले हेर्नुपर्ने अवस्था रहेको छ ।

उपमहानगरपालिकाको वडा नम्बर १, ३, ४, ५, ६, १५ र १६ वडामा रहेको स्वास्थ्य चौकीमा दुई÷दुई जना, वडा नम्बर ९ को स्वास्थ्य चौकीमा तीन जना स्वास्थ्यकर्मी छन भने अन्यमा एक स्वास्थ्यकर्मीको भरमा सेवा प्रदान गर्नुपर्ने बाँध्यता रहेको छ ।

आधारभुत स्वास्थ्य प्रवाह गरिरहेको घोडसुवा स्वास्थ्य चौकीमा अहिले स्वास्थ्यकर्मी नरहेको उपमहानगरपालिकाका स्वास्थ्य महाशाखा प्रमुख योगेश अवस्थीले बताए ।

उपमहानगरपालिकाका १९ वटै वडामा आधारभुत स्वास्थ्य चौकी छन् ।