डडेल्धुरा अस्पताललाई ५ सय शय्याको बनाउने प्रस्ताव अर्थ मन्त्रालयमा

धनगढी पोष्ट

आइतबार, १५ साउन २०८० मा प्रकाशित

धनगढी । डडेल्धुरा स्थित डडेल्धुरा अस्पताललाई ५ सय शय्याको अस्पतालमा स्तरउन्नती गर्ने प्रस्ताव अर्थ मन्त्रालयमा पेश भएको छ ।

अस्पतालले ओ एण्ड एम सर्भे गर्दै ५ सय शय्यामा स्तरोन्नति गर्न प्रस्ताव गरेको हो । अस्पतालका निमित्त मेसु डा. चेतराज भट्टका अनुसार मन्त्रालयले विभिन्न चरणमा छलफल गरेर ५ सय शय्याका लागि स्विकृत गर्दै अर्थ मन्त्रालय पठाएको छ । अर्थ मन्त्रालयले सो विषयमा अहिले सम्म छलफल अघि नबढाएको निमित्त मेसु भट्टले बताए ।

उक्त प्रस्ताव पारित भए ४० विभाग र ४० एकाईका ५ सय शय्या सञ्चालन हुनेछन् । अस्पतालमा १२औं तहको निर्देशक सहित एक सय ९८ जना चिकित्सक सहित एक हजार ८७ दरबन्दी हुनेछ । अहिले अस्पतालमा एक सय शय्या मात्रै सञ्चालनमा छ । दरबन्दी पनि उपक्षेत्रीय अस्पतालको मात्रै स्विकृत भएको छ ।