महाकालीमा पानीको सतहले सतर्कता तह पारगर्यो

धनगढी पोष्ट

बुधबार, २४ साउन २०८० मा प्रकाशित

धनगढी । महाकाली नदीमा पानीको सहहले सतकताको विन्दु पार गरेको छ । महाकाली नदीमा पानीको वहाव एक लाख ३१ हजार क्युसेक मापन भएपछि शारदा ब्यारेज (बनबासा) पुलमा चार पांग्रे सवारी साधनलाई आउजाउ गर्न रोक लगाइएको छ ।

जल तथा मौसम विज्ञान विभागको बाढी पूर्वानुमान महाशाखाले सूचना जारी गर्दै डडेलधुरा र कञ्चनपुरका नदी तटीय क्षेत्र र डुबान भइरहने होचा भूभागमा रहेकाहरुलाई दिउँसो तीन बजेसम्म सतर्कता अपनाउन आग्रह गरेको छ ।

महाशाखाका अनुसार डडेलधुरास्थित पारीगाउँ बाढी मापन केन्द्रमा बाढीको सतहले ५.८० मिटर पार गरेको छ । सो केन्द्रमा बाढीको सतह ७ मिटर पुगेमा खतरा मानिन्छ । बाढीले सतर्कताको तह पार गरेपछि भारतीय सीमा सुरक्षा बल (एसएसबी)ले पुरानो भइसकेको बनबासा पुलबाट चार पांग्रे सवारी साधन सञ्चालनमा रोक लगाउने गरेको छ ।