अपि बेसक्याम्पमा पर्यटन दिवस मनाइदै

धनगढी । यस बर्षको अन्तरराष्ट्रिय पर्यटन दिवस  अपिहिमालको बेसक्याम्पमा मनाइने भएको छ । अपिहिमाल गाउपालिकाको आयोजना, प्रदेश सरकारको उद्योग, पर्यटन, बन तथा वातावरण मन्त्रालयको सहकार्य र नाटा सुदुरपश्चिमको समन्वयमा बेसक्याम्पमा पर्यटन दिवस मनाउन लागिएको हो ।

बेसक्याम्पसम्म पुग्ने आधारभुत संरचनाहरु निर्माण भैसकेकाले बेसक्याम्पमै पर्यटन दिवस मनाउन लागिएको अपिहिमाल गाउपालिकाका अध्यक्ष भक्तसिंह ठेकरे बोहराले बताए । ‘अपिहिमाल बेसक्याम्पसम्म जाने पुर्वाधारहरु आधारभुत रुपमा तयार भएकाले यस बर्ष भ्रमण बर्षकै रुपमा मनाउन तयारी गरिएको छ ।’ शनिबार धनगढीमा आयोजित पत्रकार सम्मेलनमा अध्यक्ष बोहराले भने ‘अपि बेसक्याम्प लगायत अपिहिमाल पर्यटकीय गन्तव्यहरुको प्रचार प्रसारको उदेश्यले बेसक्याम्पमै पर्यटकीय दिवस मनाउन लागिएको हो ।’

दार्चुला जिल्लामा रहेको अपिहिमाल ७ हजार १ शय ३२ मीटरको उचाईमा रहेको छ । अपिहिमालको बेसक्याम्प चार हजार मीटरको उचाईमा रहेको छ ।

अपिहिमालको  आरोहण खुला गराउन सबै लाग्नु पर्ने भए पनि अहिले बेस क्याम्पसम्मको ट्रेकिङ सहज बनाउन लागिएको  अध्यक्ष बोहराले बताए । अपिहिमाल गाउपालिकाले आवधिक योजनाको प्रमुख प्राथमिकताको क्षेत्र पर्यटन पनि बनाएकोले आगामी पाँच बर्षभित्र सुदुरपश्चिमकै उत्कृष्ठ पर्यटकीय गन्तव्य बनाउने उदेश्यले पर्यटन पुर्वाधारमा काम भैरहेको अध्यक्ष बोहराले बताए ।

 बेसक्याम्पसम्मको रुप म्याप पनि बनाइसकेको अधयक्ष बोहराले बताए । बोहराका अनुसार बेसक्याम्पसमा दुई वटा पयटकीय आवास गृह निर्माण भएको र दैपनक ६० जनासम्म खाना र बास बस्ने व्यवस्था रहेको छ । पद मार्गहरुमा  होम स्टेको व्यवस्था र स्थानीय सांस्कृतिक कार्यक्रम समेत हेर्न मिल्नेछ, स्थानीय खानाका परिकारहरु खान पाइन्छन्, पदमार्गमा साइनिङ तथा सुचना पार्टी र संकेत चिन्ह निर्माण गरिएका छन् ।

सुदुरपश्चिमका उद्योग, पर्यटन, बन तथा वातावरण मन्त्री रमेश धामीले सुदुरपश्चिम  प्रदेशमा एकीकृत रुपमा पर्यटन बिकासका योजनाहरु निर्माण गर्न शुरु गरिएको बताए ।  ‘बिगतमा टाकटुके रुपमा योजना निर्माण गर्दा खर्चलत भयो  ।  तर उपलव्धि केही देखिएको छैन ।’ मन्त्री धामीले भने त्यसैले  ‘अब प्रदेशमा गरिने पर्यटन बिकासका योजनाहरु अब एकीकृत रुपमा गरिन लागेको छ ।’

एकीकृत योजना बनाउनका लागि संघीय निकायहरु र पालिकाहरुसँग समन्वय भैरहेको मन्त्री धामीले बताए ।

  एकीकृत  योजना बनेपछि प्रदेशमा धार्मिक पर्यटनमा कति लगानी गर्ने, कसले लगानी गर्ने, प्रााकृतिक दृश्य अवलोकनका क्षेत्रमा कसले लगानी गर्ने भन्ने स्पष्ट हुने मन्त्री धामीले बताए ।

 नाटा सुदुरपश्चिमका अध्यक्ष पदम बहादुर सिंहले सँचालन  गरेको उक्त कार्यक्रमा स्वागत मन्तव्य नाटा सुदुरपश्चिमका संस्थापक अध्यक्ष माया प्रकाश भट्टले व्यक्त गरेका थिए ।