उद्योग स्थापनाका लागि सहयोग गर्न सरकार तयार छ : मुख्यमन्त्री शाह

धनगढी । हार्डवेय एक्सपोको तेश्रो दिन  धनगढीमा सुदुरपश्चिमका सम्भावना र चुनौती बिषयक अन्तरक्रिया कार्यक्रम सम्पन्न भएको छ ।

प्रदेशमा औद्योगिक वातावरण तयार पारेर बिकास अघि बढाउने सकिने सम्भावना बारेमा सरोकारवालाहरुहरुको साझा धारणा तयार गर्न कैलाली हार्डवेयर व्यवसायी संघले कार्यक्रमको आयोजना गरेको हो ।

 सो अवसरमा सुदूरपश्चिम प्रदेशका मुख्यमन्त्री कमलबहादुर शाहले  सुदूरपश्चिममा उद्योग स्थापनाका लागि आवश्यक नितिगत र व्यवहारिक सहयोग गर्न प्रदेश सरकार तयार रहेको बताएका छन् । 

मुख्यमन्त्री शाहले औद्योगिक सम्भावना भएका स्थानको समग्र विकास गर्न प्रदेश सरकार तयार रहेको बताए । तर त्यसका लागि पहिला सम्भावित औद्योगिक क्षेत्रको पहिचान हुनु जरुरी रहेको उनको भनाई छ ।

उनले प्रदेशको विकास र चुनौतीका विषयमा प्रदेश सरकारले नै छलफल गर्नुपर्ने भएपनि निजी क्षेत्रले त्यो प्रयास गरेको भन्दै कैलाली हार्डवेयर व्यवसायी संघलाई धन्यवाद दिए । तर हार्डवेयर व्यवसायी संघले आयोजना गरेको छलफलमा प्रदेश सरकारको सहभागिा रहेको बताउँदै मुख्यमन्त्री शाहले आगामी दिनमा यस्ता विषयमा सरोकारवालालाई राखेर प्रदेश सरकारले थप छलफल गर्ने बताए ।

प्रदेशका भौतिक पुर्वाधार विकास मन्त्री प्रकाश बहादुर देउवाले प्रदेशको समग्र विकासका लागि सवै दल एकजुट हुनु पर्नेमा जोड दिए । उनले आरोप प्रत्यारोपको राजनीति गरेर राजनीतिक प्रतिबद्धता र जन अपेक्षा पुरा हुन नसक्ने बताउँदै अव सवै दलकोको ध्यान विकासमा जानु अपरिहार्य रहेको बताए ।    

सुदूरपश्चिम प्रदेश सभा सदस्य शिवसिंह ओलीले प्रदेशको विकासका लागि सवै जनाले आ–आफ्नो जिम्मेवारी पुरा गर्नु आवश्यक रहेको बताए । ‘सरकारका मन्त्रीले उनीहरुको जिम्मेवारी पुरा गर्नुपर्छ, प्रदेश सभा सदस्यले पनि आफ्नो काम कर्तव्य र अधिकार केहो भन्ने बुझ्नु जरुरी छ,’ ओलीले भने, ‘अनि जनता पनि आफ्नो जिम्मेवारी पुरा गर्न तयार हुनु पर्दछ, त्यसपछि मात्रै हामीले सोचेको विकास र परिवर्तन ल्याउन हामी सफल हुन सक्छौं  ।’

सुदूरपश्चिम विश्वविद्यालयका उप कुलपति प्राध्यापक डा. अम्मराज जोशीले निजी क्षेत्र प्रदेश र देशको विकासका लागि कति जिम्मेवार छ भन्ने कुरा हार्डवेयर व्यवसायीले गरेको छलफलबाट थाहा हुने बताए ।

‘सरकारले गर्नुपर्ने काम निजि क्षेत्रले गरेको छ, यहाँको विकास र सम्वृद्धिमा निजि क्षेत्र चिन्तित छ भन्ने कुरा यसबाट प्रस्ट भएको छ,’ उपकुलपति जोशीले भने, ‘उनीहरुको विकास प्रतिको चिन्तनलाई सरकारले ब्झ्नु जरुरी छ ।’

सुदूरपश्चिम प्रदेशका प्रमुख सचिव नारायण प्रसाद शर्मा दुवाडीले शासकीय स्वरुपमा हुने सोच र दृढतामा समग्र विकास निर्भर रहने बताए । उनले पछिल्लो समय नागरिक, कर्मचारी तथा राजनीतिक नेतृत्वमा जिम्मेवारी वहनको कमी हुन थालेको भन्दै पहिला सवैले आ–आफ्नो जिम्मेवारी पुरा गर्ने परिपाटिको विकास हुनु जरुरी रहेको बताए ।

सुदूरपश्चिम प्रदेश सरकार थुप्रै चुनौतिका बीचबाट अघि बढ्ने प्रयास गरिरहेको प्रमुख सचिव दुवाडीले बताए ।

प्रदेश नीति तथा योजना आयोगका उपाध्क्ष अनुपराज उपाध्यायले छलफलले आगामी दिनमा नीति तथा योजना बनाउन सहज हुने बताए । उनले प्रदेश सरकार सही ट्रयाकमै रहेको र अहिले नै निरास हुनुपर्ने अवस्था नरहेको बताए ।

अन्तरक्रिया कार्यक्रममा सुदूरपश्चिम विश्वविद्यालयका तर्फबाट डा. दिपकचन्द्र भट्ट र आर्थिक विज्ञ प्रा. डा राजेन्द्र बिर चन्दले सुदूरपश्चिममा विकासका सम्भावना र चुनौति विषमा तयार पारिएको कार्यपत्र प्रस्तुत गरेका थिए भने, प्रदेश निति तथा योजना आयोगका सचिव पदमराज जोशीले सुदूरपश्चिम प्रदेशको वर्तमान अवस्थाका विषयमा तयार पारेको कार्यपत्र प्रस्तुत गरेका थिए ।

 कैलाली हार्डवेयर व्यवसायी संघका संस्थापक अध्यक्ष मायाप्रकाश भट्टको अध्यक्षतामा अन्तरक्रिया कार्यक्रममा स्वागत मन्तव्य हार्डवेयर संघका अध्यक्ष कुबेर शाहीले व्यक्त गरेका थिए भने कार्यक्रम संचालन ज्योति भट्टले गरेका थिए ।