विपिनको रिहाइका लागि आफन्तले गरे परराष्ट्र मन्त्रीसंग अपिल

धनगढी । इजरायलबाट हमासले नियन्त्रणमा लगेका कञ्चनपुरका विपिन जोशीको रिहाईका लागि पहल गर्न आफन्तले परराष्ट्रमन्त्री एनपि साउँदसंग अपिल गरेका छन् ।

मन्त्री साउँदलाई शनिवार महेन्द्रनगरमा भेटेर विपिनका बुबा महानन्द जोशी र आमा पद्मा जोशीले हमास समूहको नियन्त्रणमा रहेका छोराको रिहाइका लागि पहल गर्न आग्रह गरेका हुन् । विपिन ४३ दिनदेखि विद्रोही समूह हमासको नियन्त्रणमा छन् । ‘चाँडोभन्दा चाँडो छोराको रिहाइका लागि नेपाल सरकारले पहल गरिदिनु प¥यो,’ मन्त्री साउदलाई विपिनका बुबा आमाले भने, ‘छोराको चिन्ताले हामीलाई दिनरात सताइरहेको छ, जसरी पनि सरकारले सकुशल ल्याइदिनु प¥यो ।’ भीमदत्त नगरपालिका–३ घर भएका विपिनका बुबा आमाले यसअघि कञ्चनपुरका प्रमुख जिल्ला अधिकारी गोपालप्रसाद अधिकारीमार्फत मन्त्री साउँदलाई ज्ञापनपत्र समेत पठाएका थिए ।

भेटघाटका क्रममा मन्त्री साउँदले विपिनको सकुशल रिहाइका लागि नेपाल सरकारले सक्दो पहल गरिरहेको बताए । ‘कूटनीतिक माध्यमबाट विपिनको सकुशल रिहाइका लागि पहल जारी राखेका छौँ,’ मन्त्री साउँदले भने,  ‘हामी पनि यो घटनाबाट चिन्तित छौँ ।’