सुदूरपश्चिम महोत्सवको १७औं संस्करण मंसिर २२ गते देखि, आगलागि पिडित व्यवसायीलाई निशुल्क स्टल दिइने

धनगढी । २०६३ साल देखि निरन्तर सञ्चालन हुँदै आएको सुदूरपश्चिम महोत्सवको १७औं संस्करण यही मंसिर २ गते देखि धनगढी–१ शान्तिनगरटोलमा सञ्चालन हुने भएको छ ।

महोत्सव पुस २ गते सम्म सञ्चालन हुने कैलाली उद्योग वाणिज्य संघका अध्यक्ष तथा नेपाल उद्योग वाणिज्य महाँसंघका केन्द्रिय सदस्य पुष्पराज कुँवरले बताए ।

महोत्सव उद्घाटन प्रधानमन्त्री पुष्पकमल दहालबाट गराउने तयारी गरिएको भएपनि अहिलेनै  एकिन नभएको अध्यक्ष कुावरले बताए । सुदूरपशिचम प्रदेशको समग्र विकासलाई एजेण्डा बनाउँदै कैलाली उद्योग वाणिज्य संघले सरकारलाई बुदागत रुपमा ध्यानाकर्षण गराउँदै आएको छ । यस पटक पनि ‘धनगढीमा पर्दशनी स्थल’ लाई मुख्य एजेण्डा बनाउँदै अन्य विभिन्न मागहरु तयार गरिने अध्यक्ष कुँवरले बताए ।

मंसिर २२ देखि सुरु हुने महोत्सवले संकुचित बनेको अर्थतन्त्रलाई चलाएमान बनाउन भुमिका खेल्ने अपेक्षा उद्योग वाणिज्य संघले गरेको छ । ‘आर्थिक मन्दिका कारण व्यापार, व्यवसाय खुम्चिएको छ,’ अध्यक्ष कुँवरले भने, ‘यस्तो अवस्थामा महोत्सवले व्यापार व्यवसायलाई खुकुलो बनाउदै अर्थतन्त्रलाई केही हद सम्म चलायमान बनाउने छ ।’ अध्यक्ष कुँवरले यस पटकको महोत्सवमा ४ सय स्टल राखिएका र ती मध्य अधिकांस स्टलमा स्थानीय व्यवसायीले ठाउँ पाउने बताए ।

ती मध्य पनि धनगढीको मुख्य सडक निर्माणाधिन अवस्थामा रहेका कारण मुख्य सडक क्षेत्रका व्यापारीले स्टल राखे ५० प्रतिशत छुट दिइने र मंसिर २ गते भएको आगलागीका कारण नोक्सानी व्यहोरेका धनगढीका व्यवसायीलाई निशुल्क स्टलको व्यवस्था गरिएको कुँवरले बताए ।

महोत्सव सञ्चालन गर्न दुई करोड सम्म लगानी लाग्ने अनुमान गरिएको र महोत्सव अवधिभर १० करोड सम्मको कारोवार हुने अनुमान गरिएको जनाइएको छ । महोत्सवमा ५ लाख दर्शकले अवलोकन गर्ने अनुमान गरिएको उद्योग वणिज्य संघले अवलोकनका लागि साधारण तर्फ प्रतिव्यक्ति एक सय, विद्यार्थीका लागि ५० र फरक क्षमता भएका नागरिकका लागि परिचय पत्रका आधारमा निशुल्क अवलकोन गर्ने व्यवस्था गरेको छ ।

महोत्सवमा स्थानीय देखि राष्ट्रिय स्तरमा ख्याति कमाएका कलाकारलाई सहभागि गराइने अध्यक्ष कुँवरले बताए । १७औं संस्करणको महोत्सव सञ्चालनका लागि उद्योग वाणिज्य संघले अध्यक्ष पुष्पराज कुँवरको नेतृत्वमा मुल समिति तथा अन्य ३० वटा उप–समिति गठन गरेको छ । महोत्सवमा सरकारी निकाय संगै गैर सरकारी संस्थासंगपनि समन्वय गरेर सुरक्षाको व्यवस्था गरिने अध्यक्ष कुँवरले बताए ।