हात्ती आतंकले त्रसित बन्दै भीमदत्तका नागरिक

धनगढी । शुक्लाफाँटा राष्ट्रिय निकुञ्जबाट हात्ती वस्तीमा पस्न थालेपछि कञ्चनपुरको भीमदत्त नगरपालिकाका नागरिक त्रसित बन्न थालेका छन् ।

बर्षा सकिएपछि हात्ती भीमदत्तका विभिन्न वस्तीमा छिर्न थालेका थिए । रातीको समयमा हात्ती वस्तीमा पस्ने र बालीनाली नोक्सान गर्दै घर भत्काउँन थालेपछि स्थानिय त्रसित बनेका हुन् ।

भीमदत्त नगरपालिका १३ देखि १९ सम्म शुक्लाफाँटा निकुञ्ज किनारका सबै वस्तीमा दैनिक जसो हात्ती आउने गरेका छन् । हात्तीले स्थानीयको बालीनाली, तरकारी र कच्ची घर भत्काएको छ । भीमदत्त नगरपालिका १८ का वडा सदस्य हेम बहादुर बस्नेतले हात्तीको त्रासले निकुञ्ज किनारका वस्तीमा त्रास फैलिएको बताए ।

अहिले वडा नम्बर १३ देखि किनारका सबै वडामा हात्ती दिनदिनै राति आउने गरेकोले त्रास बढेको बताए । हात्तीबाट कसरी जोगिने हो भन्ने समस्या र चिन्ता लागेको उनले बताएका छन् । भीमदत्त नगरपालिका कार्यपालिका सदस्य चक्र सुनारले हात्तीको त्रासले वासिन्दाको रातको निन्द्रा हराएको बताए । हात्ती कति बेला आएर नोक्सान गर्ने हो भनेर रातभरि सुत्न नपाएको उनले भने ।

उनका अनुसार हात्तीले स्थानीयको गहुँबाली कुल्चेर नोक्सान गरि दिएको छ । शुक्लाफाँटाबाट राति तीन चार हात्ती एक साथ र अर्को हात्ती एक्लै वस्तीमा आउने गरेको स्थानीय बताएका छन् । एक्लै वस्तीमा आउने हात्ती पटाका पड्काउँदा पनि हलचल नगरी बस्ने गरेको कार्यपालिका सदस्य सुनारले बताए ।