जेसिबी दुर्घटना हुँदा चालकको मृत्यु

धनगढी । बझाङमा जेसिबी दुर्घटना हुँदा एक जनाको मृत्यु भएको छ । जयपृथ्वी नगरपालिका ९ सिमखेतस्थित पुरानो बसपार्क नजिकबाट सु=प=प्र= २४५३ नम्बरको जेसिबी दुर्घटना हुँदा बित्थडचिर गाउँपालिका–६ का ३० वर्षीय प्रकाश कठायतको मृत्यु भएको प्रहरीले जनाएको छ ।

जिल्ला प्रहरी कार्यालय बझाङका अनुसार सोमबार राती जेसिबी बसपार्कबाट जयपृथ्वी नगरपालिका कार्यालयतर्फ जाँदै गर्दा सडक खण्डबाट २० मिटर तल खस्दा चालकको घटनास्थलमै मृत्यु भएको हो ।

चालक सिटमुनि च्यापिन गई घटनास्थलमै मृत्यु भएको प्रहरीले बताएको छ । अहिले मृतक कठायतको शव पोस्टमार्टमका लागि जिल्ला अस्पताल लगिएको छ । मृतक कठायत जयपृथ्वी नगरपालिकाको जेसिवी मेसिन चलाउँदै आएका थिए । दुर्घटनाको कारण भने खुल्न सकेको छैन । घटनाको विषयमा थप अनुसन्धान भइरहेको बझाङ प्रहरीले जनाएको छ ।