सुदूरपश्चिमबाट मन्त्रीलाई फिर्ता बोलाउन माओबादी अध्यक्ष प्रचण्डसंग माग

धनगढी । नेकपा माओबादी केन्द्रका सुदूरपश्चिम प्रदेश सभा सदस्यले सरकारमा सहभागि मन्त्रीलाई फिता बोलाउन माग गरेका छन् ।

शनिबार प्रदेश सभा सदस्यले माओबादी केन्द्रका अध्यक्ष प्रचण्डलाई भेटेर सरकारमा सहभागि मन्त्रीलाई फिर्ता बोलाउन माग गरेका हुन् । प्रदेश सरकार सुस्त भएको भन्दै माओवादी केन्द्र संसदीय दलका बहुमत प्रदेश सभा सदस्यहरूले माओवादी अध्यक्ष, प्रधानमन्त्री पुष्पकमल दाहाल प्रचण्डलाई सरकारको विषयमा गम्भीर हुन आग्रह गरेका हुन् ।

सुदूरपश्चिम प्रदेशका सभामुख भीम भण्डारी, प्रमुख सचेतक मानबहादुर धामी, राज्यमन्त्री गीता माल सहितका सात जना प्रदेश सभा सदस्यहरूले प्रधानमन्त्रीलाई सुदूरपश्चिम सरकार हेरफेर गर्न आग्रह गरेका छन् । भण्डारी, धामी र माल सहित माओवादीका सांसद अक्कल रावल, ओम विक्रम भाट सरल,शिवसिंह ओली र लक्ष्मी विक सहितले सरकारको काम प्रभावकारी नभएको गुनासो गरेका छन् ।

नेकपा माओबादी केन्द्रबाट २ जना  मन्त्री र १ जना राज्य मन्त्री सरकारमा सहभागि छन् । माओबादी केन्द्रबाट उद्योग पर्यटन वन तथा वातावरण मन्त्रीमा रमेश धामी र सामाजिक विकास मन्त्रीमा झपट साउद छन्, भने राज्य मन्त्री गीता माल सहभागि छन् ।

‘सरकार निकै सुस्त भयो, हाम्रो पार्टी बाट सरकारमा जानु भएकाहरूले पनि धेरै काम गर्न सक्नु भएन,’ माओवादीका प्रमुख सचेतक मानबहादुर धामीले भने ‘हाम्रा मन्त्रीलाई फिर्ता बोलाउन र सरकार हेरफेर गर्न हामीले सम्माननीय प्रधानमन्त्री तथा पार्टी अध्यक्षलाई आग्रह गरेका छौँ ।’

सुदूरपश्चिम प्रदेश सभामा माओवादीका सभामुख सहित ११ सांसद छन् । बालुवाटारमै सरकार हेरफेर गर्न ७ जना पुगेपछि प्रधानमन्त्री प्रचण्ड पनि गम्भीर भएका थिए । जवाफमा माओबादी केन्द्रका अध्यक्ष पुष्पकमल दहाल प्रचण्डले सो विषयमा थप छलफल गरेर अघि बढ्ने बताए ।