लक्ष्मी सहकारीले मनायो १४औं बार्षिक साधारण सभा

धनगढी । धनगढी स्थित लक्ष्मी बचत तथा ऋण सहकारी संस्थाले विविध कार्यक्रम गरी १४औं बार्षिक साधारण सभा सम्पन्न गरेको छ ।

संस्थाले आर्थिक बर्ष २०७९/८० मा ९ दशमलव १३ प्रतिसत आर्थिक वृद्धि गरेको छ । शुक्रबार धनगढीमा सम्पन्न साधारण सभामा आफ्नो प्रतिवेदन प्रस्तुत गर्दै संस्थाका अध्यक्ष सञ्जय कुमार पन्तले आर्थिक वर्ष २०७९/८० मा कारोबारमा उल्लेख्य वृद्धि नभए पनि संस्था नाफामा गएको बताए । 

सभामा प्रस्तुत गरिएको आर्थिक वर्ष २०७९/८० को प्रतिवेदन अनुसार २५ जना शेयर सदस्यहरु दर्ता गरी २५ लाख सेयर पुँजीबाट सञ्चालन गरेको सहकारीमा हाल  १ हजार ४ सय ५७ जना सदस्य र सेयर पुजीँ १ करोड ७१ लाख ७८ हजार ५ सय पुगेको छ । यस्तै सोही आर्थिक वर्षमा कुल बचत १४ करोड ९५ लाख ४० हजार १ सय ५४ रहेको छ भने संस्थाको कुल नाफा ३० लाख ६४ हजार २ सय २९ रुपैयाँ रहेको छ । जुन ९दशमलव १३ प्रतिसतले वृद्धि हो । 

सभामा संस्थाले  उत्कृष्ट बचतकर्ता नितु साउद र  कल्पना जोशी सम्मानित गरेको छ । यस्तै सम्मानित हुनेमा उत्कृष्ट ऋणी लक्ष्मी दर्ला मगर  र गजेन्द्र चौधरी, उत्कृष्ट कर्मचारी बजार प्रतिनिधि श्रीस्वरी कुस्मी र वरिष्ठ सहायक सुरेन्द्र बहादुर कुँवर पनि रहेका छन् ।

लक्ष्मी सहकारीले यस वर्षबाट सुरु हुने गरी सेयर सदस्यहरूका सन्तान मध्य कक्षा १२ मा उत्कृष्ट नतिजा ल्याएर पास भएकालाई पनि   सम्मान गरेको छ । जसका हिमानी बोगटी र र्शिजल जोशी पर्न सफल भएका छन् । कार्यक्रममा संस्थाका सम्पूर्ण कर्मचारी लगायत बचतकर्ता तथा सेयर सदस्यहरूको उपस्थिति रहेको थियो ।